Prezidentimizdiń 2025-jıl 3-noyabrdegi 328-sanlı qararı menen “Joqarı bilimlendiriw shólkemleri pitkeriwshileriniń jumısqa jaylasıwına járdemlesiw boyınsha qosımsha ilajlar haqqında”ǵı qararına ózgerisler hám qosımshalar kirgizildi.

Jańa tártipke bola, joqarı bilimlendiriw mákemeleriniń pitkeriwshilerin jumıs penen támiyinlegen isbilermenlerge 2 jıllıq jeńilletilgen dáwir menen, 7 jıl múddetke shekem 5 milliard sumǵa shekem kredit ajıratıladı.
Kreditler Oraylıq banktiń tiykarǵı stavkasınan 4 procentlik punkt joqarı stavkada beriledi.
Hár bir 1 milliard sumlıq kredit ushın isbilermen keminde 1 pitkeriwshini jumısqa alıwı shárt.
Jeńilletilgen kreditler óndiris hám xızmet kórsetiw tarawındaǵı joybarlardı ámelge asırıw, tiykarǵı qurallar satıp alıw hám aylanba qarjılardı tolıqtırıw ushın beriledi.
Eger isbilermen jeńilletilgen kredit tiykarında jumısqa alǵan pitkeriwshi menen miynet shártnamasın 2 jıl ishinde biykarlasa, kredit procenti kommerciyalıq stavkaǵa ózgertiledi. Biraq, 1 ay ishinde basqa pitkeriwshi jumısqa qabıl etilse, bul qaǵıyda qollanılmaydı.
Sonday-aq, pitkeriwshiler arasında eń jaqsı startap hám innovaciyalıq joybarlar tańlawı ótkeriledi. Tańlaw jeńimpazlarına keminde 2 pitkeriwshini jumısqa alıw shárti menen 1 milliard sumǵa shekem grant ajıratıladı.

ÓzA