Ózbekstan Respublikası Prezidenti Shavkat Mirziyoevtiń Qatar Mámleketine ámeliy saparı juwmaqlandı.

Sapar etiw sheńberinde mámleketimiz basshısı Sociallıq rawajlanıw boyınsha ekinshi Jáhán sammitinde qatnasıp, onda turaqlı hám inklyuziv sociallıq rawajlanıwdı ámelge asırıw jáne sociallıq-ekonomikalıq rawajlanıwdı jaqsılaw boyınsha globallıq sheriklikti bunnan bılay da bekkemlewge qaratılǵan bir qatar áhmiyetli baslamalardı alǵa qoydı.

Mámleketimiz basshısı Doxa qalasında Qatar Ámiri Shayx Tamim bin Hamad Ol Soniy menen de nátiyjeli sóylesiw ótkerdi.

Shayx Hamad atındaǵı xalıqaralıq aeroportta Ózbekstan Prezidentin Bas ministrdiń orınbasarı, qorǵanıw ministri Shayx Saud bin Abdurahmon Ol Soniy hám basqa da rásmiy shaxslar shıǵarıp saldı.
Mámleketimiz basshısı AQSh Prezidenti Donald Tramptıń mirát etiwine bola Oraylıq Aziya mámleketleri hám AQSh jetekshileriniń “C5+1” formatındaǵı sammitinde qatnasıw ushın Vashington qalasına jónep ketti.
Sapar baǵdarlamasına muwapıq, Prezidentimiz AQSh Prezidenti Donald Tramp, Kongress Senatı hám Wákiller palatasınıń aǵzaları, AQSh ministrlikleri hám uyımlarınıń basshıları menen ushırasıwlar ótkeredi.
Ózbekstan menen AQSh arasındaǵı strategiyalıq sheriklik qatnasıqların, bárinen burın, sawda-ekonomikalıq, investiciyalıq hám gumanitarlıq tarawlarda jáne de keńeytiw hám bekkemlew, sonday-aq, Oraylıq Aziyanıń AQSh penen regionlararalıq birge islesiwin tereńlestiriw máseleleri kórip shıǵıladı.

Isbilermenlik baǵdarlaması sheńberinde AQShtıń jetekshi kompaniyaları hám finanslıq institutlarınıń basshılarınıń qatnasıwında ushırasıw hám ilajlar ótkeriliwi rejelestirilgen.

Ilajlar juwmaǵında bir qatar eki hám kóp tárepleme hújjetlerdiń qabıl etiliwi názerde tutılǵan.

ÓzA