Elimizde jergilikli isbilermenler ushın keleshekte jańa sherikler tabıw, sawda baylanısların bekkemlew imkaniyatı keńeymekte.

Saudiya Arabstanında 50 den aslam mámleketten 200 ge shamalas islep shıǵarıwshını birlestirgen “Foodex Saudi 2025” kórgizbesi usı jılı 13 márte ótkerilmekte. Onda Ózbekstan delegaciyası 140 kvadrat metr maydanda óz ónimleri menen qatnaspaqta, delinedi Ósimlikler karantini hám onı qorǵaw agentliginiń maǵlıwmatında.
Kórgizbege Ózbekstannıń 20 dan aslam jergilikli isbilermenleri tárepinen jetistirilgen miywe-ovoщlar da qoyılǵan. Túrkiya, Qıtay hám Arab Ligasına aǵza mámleketlerdiń pavilonları menen bir qatarda jaylasqan milliy maydanımızda kórsetilip atırǵan ónimler kóplegen sırt elli qatnasıwshılar hám miymanlarda úlken qızıǵıwshılıq oyatpaqta.
“Foodex Saudi Jeddah 2025” azıq-awqat sanaatı, texnologiyalar hám tutınıw ónimleriniń eksportına baǵıshlanǵan eń iri kórgizbe bolıp esaplanatuǵının atap ótiw kerek. “Jeddah International Exhibition & Convention Centre” orayında ótkeriletuǵın kórgizbe 6-noyabrge shekem dawam etedi.
Kórgizbede tiykarınan importyorlar hám isbilermen topar wákilleri, distribyutorlar, miymanxanalar hám “HoReSa” baǵdarınıń wákilleri belsene qatnasadı.
Usı jılı kórgizbege 15 mıńnan aslam miyman keliwi kútilmekte. Bul bolsa Ózbekstan ónimleri ushın Persiya qoltıǵı mámleketlerine eksport geografiyasın keskin arttırıwda jáne bir qádem bolıp esaplanadı.

A.RUSTAMOV, ÓzA