YuNESKO Bas konferenciyasınıń 43-sessiyası múnásibeti menen Samarqand qalasındaǵı Registan kompleksindegi Mırza Ulıǵbek hám Tillakori medreselerinde turaqlı jumıs alıp barıp atırǵan muzey ekspoziciyaların jańalaw hám ishki bólimlerin restavraciyalaw boyınsha keń kólemli jumıslar juwmaqlandı.

– Jańalanǵan ekspoziciyalar Samarqand hám temuriyler dáwiriniń tariyxıy-mádeniy miyrasın zamanagóy tiykarda talqılap, sol dáwirde Samarqand ilim, bilimlendiriw hám kórkem ónerdiń iri oraylarınan biri bolǵanın kórsetedi, – deydi Registan kompleksiniń basshısı Xanqul Samarov.
– Sonıń ishinde, Mırza Ulıǵbek medresesiniń ekspoziciyası Ábiw Rayxan Beruniy, Ibn Sina, Áliy Qusshı sıyaqlı oyshıllardıń 50 den aslam biybaha qoljazbaları, XV ásirdiń ullı astronomı hám aǵartıwshısı Mırza Ulıǵbektiń jumısın sáwlelendiretuǵın ilimiy ásbap-úskeneler hám tariyxıy materiallar menen bayıtıldı. Tillakori medresesindegi kórgizbe bolsa Registan ansambliniń qáliplesiw tariyxı hám onıń arxitekturalıq gózzallıǵın ashıp beredi. Ekspoziciya sanlı rekonstrukciyalar hám interaktiv elementler menen bayıtılıp, tamashagóyge tariyxtı jáne de janlı seziw imkaniyatın jaratadı.
Eksponatlardıń kópshiligi francuz hám ózbekstanlı restavratorlar menen birgelikte qayta tiklengen. Yaǵnıy, jańalanǵan muzey mákanınıń dizaynı francuzlardıń Wilmotte & Associés arxitekturalıq byurosı tárepinen islep shıǵılıp, Shıǵıs dástúrleriniń biytákirar ruwxı zamanagóy muzeytanıwdıń talaplarına únles tárizde jámlengen.
Házirgi waqıtta bul orınlar YuNESKO Bas konferenciyası sessiyasınıń qatnasıwshıları hám miymanlar menen tolı.

ÓzA