Germaniya Federativlik Respublikası Bundestagi Huqıqıy máseleler hám tutınıwshılardıń huqıqın qorǵaw boyınsha komitetiniń baslıǵı Myuller Karsten basshılıǵındaǵı delegaciya Oliy Majlis Nızamshılıq palatasına keldi. Delegaciya wákilleri tómengi palatanıń Korrupciyaǵa qarsı gúresiw hám sud-huqıq máseleleri komitetiniń baslıǵı Jahongir Shirinov penen ushırastı.

Sóylesiwde miymanlarǵa mámleketimizde korrupciyaǵa qarsı gúresiw tarawında ámelge asırılıp atırǵan reformalar, milliy nızamshılıqtı jetilistiriw baǵdarındaǵı jumıslar hám bul baǵdardaǵı tiykarǵı wazıypalar boyınsha hár tárepleme málimleme berildi.
Sonday-aq, ushırasıwda puqaralıq jámiyeti institutlarınıń jumısı, olardıń mámleketlik siyasat hám nızam dóretiwshiligi procesindegi ornı, korrupciyaǵa qarsı gúresiw tarawında ámelge asırılıp atırǵan reformalar hám nızamshılıqtı jetilistiriw ilajları, parlament palatalarınıń korrupciyaǵa qarsı gúresiw tarawındaǵı nızamshılıqtı rawajlandırıwdaǵı birge islesiwi boyınsha maǵlıwmatlar berildi.
Ushırasıwda tárepler parlamentleraralıq baylanıslardı bunnan bılay da keńeytiw hám óz-ara paydalı birge islesiwdi barlıq tiykarǵı tarawlarda rawajlandırıw boyınsha pikir alıstı.
Myuller Karsten basshılıǵındaǵı delegaciya Samarqandta da bolıp, Samarqand mámleketlik universitetine bardı. Bul bilimlendiriw mákemesinde huqıqtanıwshı kadrlar tayarlaw baǵdarındaǵı jumıslar, bilimlendiriw processleri menen tanıstı.
Bunnan tısqarı, miymanlar Samarqand wálayatı ádillik basqarmasında boldı. Bul jerde miymanlarǵa advokatura institutınıń jumısı, wálayatlıq ádillik basqarmasında alıp barılıp atırǵan jumıslar haqqında maǵlıwmat berildi.

M.Komilova, ÓzA