Usı jıldıń oktyabr ayında Oliy Majlis Nızamshılıq palatasındaǵı ÓzLiDeP frakciyasınıń basshısı Aktam Xaitov basshılıǵındaǵı deputatlar hám jergilikli Keńes deputatları Qaraqalpaqstan Respublikasınıń barlıq rayon hám qalalarında isbilermenler, fermerler hám xalıq wákilleri menen ushırasıwlar ótkerdi.

Bul ushırasıwlardan gózlengen tiykarǵı maqset-ekonomikalıq reformalardıń nátiyjeliligin arttırıw, óndiris processlerindegi bar mashqalalardı úyreniw, sonday-aq, isbilermenlikti rawajlandırıwǵa qaratılǵan ámeliy usınıslar islep shıǵıw bolıp tabıladı.

Usı sheńberde Oliy Majlis Nızamshılıq palatasınıń deputatı Gúljan Xalmuratova hám partiya aǵzalarınan dúzilgen jumısshı topar Moynaq rayonında jumıs alıp barıp atırǵan “Moynaq mineral duzı” hám “Moynaq Agro tekstil” juwapkershiligi sheklengen jámiyetleriniń jumısı menen jaqınnan tanıstı. Deputatlar kárxana basshıları, jumısshılar hám jergilikli isbilermenler menen ashıqtan-ashıq sóylesip, olardıń jumısında ushırasıp atırǵan mashqalalar, usınıs hám baslamaların tıńladı.

Ushırasıwlar dawamında islep shıǵarıw tarawındaǵı tiykarǵı máselelerden biri sıpatında transport hám logistika infrastrukturasınıń jeterli dárejede rawajlanbaǵanı atap ótildi. Ásirese, uzaq aymaqlarǵa ónimlerdi jetkerip beriwde jol sapasınıń tómenligi hám máwsimlik mashqalalar sebepli qárejetlerdiń artıwı kárxanalardıń jumısına unamsız tásir kórsetip atırǵanı atap ótildi. Deputatlar bul baǵdarda jergilikli jollardı ońlaw hám sanaat zonalarına shekem logistika infrastrukturasın rawajlandırıw boyınsha nızamshılıq baslamaların islep shıǵıw usınısın bildirdi.

“Moynaq mineral duzı” kárxanasında 2 million 71 mıń AQSh dolları muǵdarındaǵı investiciya tiykarında islep shıǵarıw quwatlılıǵı keńeytilip, joqarı sortlı “ekstra” duz islep shıǵarıw jolǵa qoyılǵan. Házirgi waqıtta kárxana hár ayda 2800-3000 tonna ónim islep shıǵarmaqta. Bunıń nátiyjesinde 150 den aslam jergilikli xalıq turaqlı jumıs penen támiyinlengen. Ónimler tek ǵana mámleketimiz bazarına emes, al Gruziya, Awǵanstan hám Qazaqstan sıyaqlı mámleketlerge de eksport etilmekte. Kárxana basshısınıń atap ótkenindey, ÓzLiDeP deputatları menen ashıq sáwbetler isbilermenler ushın úlken áhmiyetke iye, sebebi olardıń pikir hám usınısları tiykarında ámeliy sheshimler islep shıǵıladı.

Sonday-aq, frakciya wákilleri 2023-jıl dekabr ayında iske qosılǵan “Moynaq Agro tekstil” JShJ jumısı menen de tanıstı. Bul kárxanada 50 hayal-qız turaqlı jumıs penen támiyinlengen bolıp, tiykarınan er adamlar ushın arnawlı jumıs kiyimleri hám formalar tigiledi. Tayar ónimler Tashkent qalasına jetkerilip, tender tiykarında ishki bazarǵa tarqatıladı. Kárxana basshısı Karimulla Fayzullaevtıń atap ótiwinshe, kárxana jumısın jáne de keńeytiw, jańa jumıs orınların jaratıw hám xalıqtıń bántligin támiyinlew rejelestirilgen.

Sóylesiwler dawamında jumısshılar tárepinen elektr energiyası támiynatındaǵı úzilisler hám jumıs procesindegi qıyınshılıqlar haqqında da pikirler bildirildi. Deputatlar bul máselelerdi tiyisli mámleketlik uyımlar menen birgelikte úyrenip, turaqlı energiya támiynatın támiyinlew boyınsha ámeliy ilajlar kóriw niyetinde ekenligin málim etti. Sonday-aq, isbilermenler tárepinen salıq minnetlemelerin jeńilletiw, esabat júrgiziw hám tólew processlerin ápiwayılastırıw, sonday-aq, óndiris tarawı ushın maman kadrlar tayarlaw sistemasın jetilistiriw boyınsha usınıslar bildirildi.

Ótkerilgen ushırasıwlar nátiyjeleri tiykarında frakciya tárepinen ekonomikalıq iskerlikti bunnan bılay da rawajlandırıw, kishi sanaat zonaların keńeytiw, agrobiznesti qollap-quwatlaw hám isbilermenler ushın qolaylı huqıqıy ortalıq jaratıwǵa qaratılǵan ámeliy usınıslar islep shıǵılmaqta.

ÓzLiDeP partiyasınıń tiykarǵı wazıypası – isbilermenlerdiń máplerin qorǵaw, olardıń jumısında ushırasıp atırǵan mashqalalardı ornında úyreniw hám sheshim tabıw bolıp tabıladı.

Qaraqalpaqstan xabar agentligi