Prezidenttiń PQ-316-sanlı qararına bola, 2026-2027-oqıw jılınan baslap dual bilimlendiriw formasında bilim alıp atırǵan oqıwshılardıń oqıw dáwiri olardıń ulıwma miynet stajına kirgiziledi.

Sonday-aq, dual bilimlendiriw sistemasında oqıp atırǵan oqıwshılarǵa arnawlı platforma arqalı hár aylıq stipendiya tólew jolǵa qoyıladı.
Onda hár aylıq stipendiya bazalıq esaplaw muǵdarınıń bir esesi muǵdarında belgilenedi. Stipendiya Kásiplik bilimlendiriw agentligi tárepinen texnikumlarǵa ajıratıladı. Eger oqıwshınıń kásiplik kónlikpeleri yamasa tártibi qanaatlandırarsız dep bahalansa, stipendiya tólemleri toqtatıladı.
Dual bilimlendiriwdegi oqıwshılarǵa tólenetuǵın stipendiya menen baylanıslı qárejetler olardıń ámeliyat ótew ushın ajıratılǵan qarjılar esabınan qaplanadı.
Sonday-aq, qararǵa muwapıq, mámleketlik satıp alıwlarda texnikumlar islep shıǵarǵan ónimler (tovar, jumıs, xızmet) ge 15 procentlik preferenciya beriledi.
Mámleketlik uyımlar hám shólkemlerge texnikumlardı tartqan halda tómendegi jumıs baǵdarların autsorsing tiykarında shólkemlestiriw huqıqı beriledi:
– kompyuter texnikası, ısıtıw, suwıtıw hám elektr energiyası sistemaları, sonday-aq, avtotransport qurallarına texnikalıq xızmet kórsetiw;
– ǵalaba xabar qurallarında úgit-násiyat jumısların ámelge asırıw;
– Kásiplik bilimlendiriw agentligi menen kelisilgen basqa da baǵdarlar.

ÓzA