Ózbekstannıń Rostov-Don qalasındaǵı Bas konsulxanasınıń diplomatları Adıgeya Respublikasında oqıp atırǵan hám waqıtsha jumıs islep atırǵan studentler menen ushırastı, dep xabar bermekte “Dunyo” MA.

«Adıgeya mámleketlik universiteti basshıları hám studentler menen ushırasıwda prorektor Susanna Tlexatuk búgingi kúnde usı universitette 50 den aslam ózbekstanlı, tiykarınan shet tilleri baǵdarında bilim alıp atırǵanın atap ótti.
Universitet házirgi waqıtta Ózbekstan mámleketlik jáhán tilleri universiteti, Samarqand mámleketlik shet tilleri institutı hám Denov isbilermenlik hám pedagogika institutı menen birge islesiw baylanısların ornatqan.
Ushırasıwda studentlerge Jańa Ózbekstanda Prezident Shavkat Mirziyoevtiń basshılıǵında ámelge asırılıp atırǵan reformalar, mámlekettiń hár tárepleme jedel rawajlanıp atırǵanı hám bilimlendiriw tarawındaǵı jańalıqlar haqqında maǵlıwmat berildi.
Ózbek tiline mámleketlik til biyligi berilgeniniń 36 jıllıǵı múnásibeti menen ana tildiń áhmiyeti haqqında dógerek sáwbeti ótkerildi.
Sonday-aq, diplomatlar Maykop qalasında miynet etip atırǵan watanlaslar menen ushırastı. Olarǵa Sociallıq-ekonomikalıq reformalar, konsullıq xızmetleri haqqında maǵlıwmat berildi. Sonıń menen birge, jergilikli nızam-qaǵıydalardı húrmet etiw hám qatań ámel etiw hám hár qıylı aǵımlardan uzaq jasaw zárúr ekenligi atap ótildi», delinedi xabarda.

Qaraqalpaqstan xabar agentligi