Ámiwdárya rayonında awıl xojalıǵınıń túrli baǵdarların úylesimli rawajlandırıw, aymaqlarda turaqlı ekonomikalıq ósiwdi támiyinlew hám awıl xalqınıń bántligin arttırıw maqsetinde “Fermer xojalıqlarında kóp tarmaqlı jumıs” joybarı ámelge asırılmaqta.

Joybar sheńberinde rayondaǵı belsendi fermerler hám qıytaq jer iyeleri ushın tájiriybe almasıw hám aldınǵı jumıs usılların úyreniw maqsetinde Bekman Allabergenov atındaǵı fermer xojalıǵına ámeliy sapar shólkemlestirildi. Sapar dawamında qatnasıwshılar awıl xojalıǵındaǵı innovaciyalıq kózqaraslar, zamanagóy intensiv baǵshılıq hám resurs únemlewshi texnologiyalar menen jaqınnan tanısıw imkaniyatına iye boldı.
Bekman Allabergenov fermer xojalıǵınıń basshısı Ilham Palvanov tarawǵa derlik on jıldan berli mehir qoyıp jumıs alıp barıp atırǵan isbilermenlerden biri bolıp esaplanadı. Onıń atap ótiwinshe, usı jıl xojalıq ushın tabıslı bolǵan.
– Házirgi kúnde 110 gektar jer maydanında 50 turaqlı jumısshı menen birgelikte paxta, ǵálle, intensiv usılda tárbiyalanıp atırǵan alma hám almurt baǵları, sonday-aq, basqa da túrdegi awıl xojalıǵı ónimlerin jetistirip atırmız. Sonıń menen birge, 800 million sum muǵdarında investiciya qaratıp, muzlatqısh qoymaxanası hám jańa intensiv baǵ qurdıq. Bıyıl ǵálleden 160 tonna zúráát aldıq. Bul bolsa jámáátimizdiń tınımsız miyneti hám awızbirshiliginiń nátiyjesi bolıp esaplanadı, – deydi fermer Ilhom Palvanov.
Bunday kóp tarmaqlı jumıs fermer xojalıqlarınıń turaqlı rawajlanıwı, jańa jumıs orınlarınıń jaratılıwı hám xalıqtıń dáramat dárekleriniń keńeyiwine xızmet etpekte. Usınday joybarlar arqalı aymaqlarda innovaciyalıq kózqaraslar ámeliyatqa engizilip, awıl xojalıǵınıń básekige shıdamlılıǵı jáne de artpaqta.

Qaraqalpaqstan xabar agentligi