Eń baxıtlı mámleketler reytingin dúziwshi World Happiness Reporttiń sońǵı esabatında atap ótiliwinshe, ekonomikalıq jaǵdaydaǵı ózgesheliklerge qaramastan, Qazaqstan, Ózbekstan, Qırǵızstan hám Tájikstan turaqlı túrde joqarı dárejedegi isenim hám sociallıq tilekleslikti kórsetip keldi. Ózbekstan 140 mámleket arasında 6,2 ball menen 53-orındı iyeledi, bul onıń qayırqomlıq jumıslarınıń joqarı dárejesi (29-orın) hám policiyaǵa isenimi (19-orın) menen ajıralıp turadı. Bunnan aldınǵı izertlewde Ózbekstan 44-orındı iyelegen – sociallıq qollap-quwatlaw, saqawat hám turmıstan qanaatlanıw sıyaqlı kórsetkishler boyınsha joqarı bahalanǵan edi.

Qazaqstan 40-orındı, Qırǵızstan 5,9 ball menen 75-orındı iyeledi hám basqalarǵa járdem beriw boyınsha regionlıq jetekshige aylandı (55-orın).
Tájikstan 5,4 ball menen 90-orındı iyeledi, biraq kewillilik boyınsha dúnyada jetekshi tórtlikten birine aylandı.
Izertlew nátiyjelerine bola Belarus 59-orındı hám Ukraina 105-orındı iyeledi.
Bul esabatta Rossiya 66-orınnan 72-orınǵa túsip qalǵanı kórsetilgen.
Vologda-poisk.ru basılımınıń xabar beriwinshe, Rossiya kúshli ekonomikalıq kórsetkishlerdi saqlap qalmaqta, xalıqtıń jan basına tuwra keletuǵın jalpı ishki ónim global ortasha kórsetkishten joqarı. Biraq, basqa faktorlar onıń ulıwma baxıt indeksin tómenletpekte: mámleketlik mákemelerge isenimniń tómenlewi, ózine isenimsizlik seziminiń kúsheyiwi hám tańlaw erkinligi hám optimistliktiń tómenlewi. Qánigeler, sonday-aq, subektiv abadanlıqqa unamsız tásir kórsetetuǵın korrupciya hám sociallıq anıqsızlıqtıń joqarı dárejesin atap ótpekte.
Finlyandiya, Daniya, Islandiya, Shveciya, Niderlandiya, Kosta-Rika, Norvegiya, Izrail, Lyuksemburg hám Meksika jáne bir márte dúnyanıń eń baxıtlı mámleketleri dep tabıldı.
Baxıt indeksi xalıqtıń jan basına tuwra keletuǵın JIÓ, sociallıq qollap-quwatlaw, salamat ómir súriw dawamlılıǵı, tańlaw erkinligi, saqawat hám korrupciya haqqındaǵı kózqaraslardı esapqa aladı.
Izertlew avtorları joqarı dáramat baxıttı kepillemeytuǵının atap ótedi. Isenim, turaqlılıq hám sociallıq qáwipsizlik sezimi ádewir áhmiyetlirek. Sonıń ushın ayırım orta dáramatlı mámleketler – máselen, Ózbekstan hám Kosta-Rika Rossiyadan joqarı orındı iyeledi.
Ótken jılǵı sıyaqlı Awǵanstan dúnyadaǵı eń baxıtsız mámleket dep tán alındı.

Qaraqalpaqstan xabar agentligi