Salamat turmıs tárizin engiziw, xalıq arasında fizikalıq belsendilikti arttırıw hám densawlıqtı bekkemlew – mámleketlik siyasattıń tiykarǵı baǵdarlarınan biri bolıp tabıladı. Usı maqsette Ámiwdárya rayonında «Fizikalıq tayarlıq dárejesi» sport sınaqlarına start berildi.

Ilaj rayon hákimligi, Sport ministrligi, «Máhálle» birlespesi, Shańaraq hám hayal-qızlar bólimi menen birgelikte ótkerildi. Onıń tiykarǵı maqseti – xalıq arasında salamat turmıs tárizin úgit-násiyatlaw, sportqa bolǵan qızıǵıwshılıqtı arttırıw hám fizikalıq jaǵdaydı bahalaw arqalı salamatlıq mádeniyatın joqarılatıw.
Sport sınaqlarında 30 jastan 70 jasqa shekemgi bolǵan puqaralar belsene qatnastı. Olar juwırıw, sekiriw, búgiliw, fizikalıq teńsalmaqlılıqtı saqlaw sıyaqlı jónelisler boyınsha óz imkaniyatların sınaqtan ótkerdi. Hár bir qatnasıwshınıń nátiyjeleri arnawlı kriteriyalar tiykarında bahalanıp, olardıń fizikalıq tayarlıq dárejesi anıqlandı.
– Bul bellesiwlerdiń, ásirese, jaslar hám hayal-qızlar arasında salamatlıq mádeniyatın qáliplestiriwde áhmiyeti úlken, – deydi qatnasıwshı M.Esbergenova. – Búgin juwırıw jarıslarında qatnasıp, jáne de kúshke toldım, jańa energiya aldım.
Ilaj sońında belsendi qatnasıwshılarǵa minnetdarshılıq xatı hám estelik sawǵaları tapsırıldı. Sport trenerleri hám salamat turmıs tárizi úgit-násiyatlawshıları tárepinen xalıqqa másláhátler, fizikalıq shınıǵıwlardı tuwrı orınlaw hám salamat awqatlanıw boyınsha usınıslar berildi.

Qaraqalpaqstan xabar agentligi