Senat jalpı májilisi óz jumısın dawam ettirmekte. Májilisti kiris sóz benen ashqan Senat Baslıǵı Tanzila Norboeva usı kúnlerde dúnyanıń názeri jáne Ózbekstanda ekenine itibar qarattı.

– Samarqandta kúni keshe Prezidentimizdiń qatnasıwında YuNESKO Bas konferenciyasınıń 43-tariyxıy sessiyası ashıldı, – dedi T.Norboeva. – Tariyxıylıǵı sonda, sessiya 40 jıl ishinde birinshi márte shólkemniń Parijdegi rezidenciyasınan tısqarıda ótkerilmekte. Bul bolsa global kólemde Ózbekstanǵa bolǵan joqarı isenim artıp atırǵanı hám, álbette, tán alınıwınıń úlgisi bolıp esaplanadı.
Ótken ayda globallıq kólemdegi jáne bir áhmiyetli ánjuman – BMSh Bas Assambleyasınıń 80-yubiley sessiyasında mámleketimiz basshısı Shavkat Mirziyoev dúnya jámiyetshiliginiń bas minberinen turıp, elimizde Turaqlı rawajlanıw maqsetlerine únles halda alıp barılıp atırǵan artqa qaytpaytuǵın reformalardıń mazmunı, páti, jetiskenliklerimiz, maqset hám wazıypalarımızǵa toqtap ótti. Regionallıq hám global kún tártibindegi áhmiyetli máselelerge mámleketimizdiń múnásibeti anıq bayan etildi. Rawajlanıwǵa xızmet etetuǵın áhmiyetli usınıs hám baslamalar alǵa qoyıldı.
Ózbekstanda Pútkil jer júzilik professional bilimlendiriw sammitin ótkeriw, Oraylıq Aziya mámleketleriniń regionallıq sheriklik hám ekonomikalıq integraciyanı tereńlestiriwge qaratılǵan háreketlerin qollap-quwatlawǵa baylanıslı rezolyuciyasın qabıl etiw, Awǵanstan arqalı xalıqaralıq transport hám energetika koridorların rawajlandırıw boyınsha BMSh rezolyuciyasın qabıl etiw, “Turaqlı rawajlanıw maqsetleri ushın óz-ara transport baylanıslılıǵın bekkemlew” global mexanizmin engiziw, sanaatta “jasıl” texnologiyalar regionallıq xabın shólkemlestiriw, suw resurslarınan aqılǵa uǵras paydalanıw, klimat migraciyası máselesinde xalıqaralıq sheriklik hám muwapıqlastırılǵan siyasat júrgiziw boyınsha Global pakt qabıl etiw, densawlıqtı saqlaw, bilimlendiriw hám mádeniyat tarawlarında jasalma intellekttiń ámeliy sheshim hám modellerin biyǵárez almasıwǵa qaratılǵan Xalıqaralıq birge islesiw mexanizmin jaratıw, “Jáhán jaslarınıń tınıshlıqqa qaray háreketi”n shólkemlestiriw hám onıń rezidenciyasın Ózbekstanda jaylastırıw sıyaqlılar usılardıń qatarına kiredi.
Gender siyasatına ayrıqsha itibar qaratılıp, jámiyetlik-siyasiy tarawlarda, sonıń ishinde, isbilermenlik tarawında hayal-qızlardıń roli bunnan bılay da bekkemlenetuǵını ayrıqsha atap ótildi. Usı mánide, regionımız kóleminde Aziya hayal-qızlar forumın turaqlı platformaǵa aylandırıp, turaqlı ótkerip barıw áhmiyetli ekenligi atap ótildi.
Mámleketimiz 2030-jılǵa barıp “dáramatı ortashadan joqarı bolǵan” mámleketler qatarına kiriwdi óz aldına maqset etip qoyǵanı ayrıqsha atap ótildi.
Bul oǵada úlken shek hám oǵan erisiwde ishki imkaniyatlardı jumsaw menen birge xalıqaralıq jámiyetshilik hám sırt mámleketler menen birge islesiwdi jańa basqıshqa alıp shıǵıw oǵada áhmiyetli.
Usı mánide, mámleketimiz basshısınıń Belgiyaǵa saparı hám Evropa Awqamınıń jetekshileri menen joqarı dárejedegi ushırasıwlar, Evropanıń jetekshi kompaniyaları hám finanslıq strukturalarınıń basshıları menen sóylesiwler, dúzilgen kelisimler úlken ámeliy áhmiyetke iye.
Prezidentimizdiń qatnasıwında Ázerbayjannıń Gabala qalasında bolıp ótken Túrkiy mámleketler shólkeminiń sammiti jáne Dushanbe qalasında ótkerilgen “Oraylıq Aziya – Rossiya” formatındaǵı ekinshi sammit hám ǴMDA Mámleket basshıları keńesiniń májilisleri de xalıqaralıq baylanıslarımızda úlken ámeliy áhmiyetke iye boldı.
“Abıraylı minberlerde tek ǵana Ózbekstan emes, al Oraylıq Aziya, túrkiy dúnya hám Doslıq Awqamı xalıqlarınıń abadanlıǵına xızmet etetuǵın áhmiyetli baslamalar alǵa qoyılǵanı turaqlı rawajlanıw jolındaǵı háreketlerge áhmiyetli túrtki bolatuǵını sózsiz. Ulıwma alǵanda, Nyu-York, Bryussel, Gabala hám Dushanbedegi joqarı dárejedegi sóylesiwlerdiń tiykarında milliy máplerimiz jatır”, dedi Senat Baslıǵı.

Norgul Abduraimova,
Alimurod Mamadaminov (súwret), ÓzA