Usı kúnlerde dúnya boylap júzlegen jurnalistler bir waqıttıń ózinde Samarqand haqqında jazbaqta. Olar jazǵan hár bir qatar, efirge shıqqan hár bir kórinis arqalı Ózbekstannıń dańqı dúnyaǵa jayılmaqta.

YuNESKO Bas konferenciyasınıń 43-sessiyası sheńberinde Samarqandta shólkemlestirilgen Baspasóz orayı haqqında da usınday pikirlerdi bildiriw múmkin.
Sessiya ilajların sáwlelendiriwde dúnya hám mámleketimizdegi jetekshi ǵalaba xabar qurallarınan bes júzden aslam jurnalist qatnasıp atırǵanı aytılmaqta.
Baspasóz orayı tek ǵana texnikalıq qolaylıqlar emes, al málimleme ashıq-aydınlıǵı hám xalıqaralıq qarım-qatnas mádeniyatınıń kórgizbesi sıpatında jumıs alıp barmaqta. Jurnalistler ushın joqarı tezliktegi internet, zamanagóy kompyuterler, janlı efir studiyaları, arnawlı súwretke alıw aymaqları, dilmashlar toparları shólkemlestirilgen.
Bunday infrastruktura informaciyanıń tez hám isenimli tarqalıwın támiyinleydi. Bul tek ǵana qolaylıq emes, al Ózbekstannıń ashıq dúnyaǵa qaratılǵan málimleme siyasatınıń ámeliy kórinisi bolıp esaplanadı. Baspasóz orayı arqalı Samarqandtaǵı hár bir waqıya dúnya málimleme maydanında óz waqtında hám anıq túrde sáwlelenbekte.
Sessiya qarsańında Ózbekstan Respublikası Prezidentiniń Baspasóz xatkeri Sherzod Asadov ǵalaba xabar qurallarınıń wákilleri ushın arnawlı brifing ótkerdi. Bul tek ǵana ilajdıń mazmunınıń baylıǵın emes, al málimleme baylanıslarınıń joqarı dárejede jolǵa qoyılǵanın da kórsetti.
YuNESKOnıń bul sessiyası sońǵı 40 jıl ishinde birinshi márte Parijdegi bas rezidenciyadan tısqarıda hám birinshi márte Oraylıq Aziyada ótkerilip atırǵanı menen tariyxıy áhmiyetke iye. 190 mámleket hám xalıqaralıq shólkemlerden 2 mıń 800 den aslam wákil, sonıń ishinde, 70 ke shamalas joqarı dárejeli shaxs qatnasıp atırǵan bul forum regionnıń eń abıraylı xalıqaralıq ánjumanlarınan birine aylandı.
Baspasóz orayınan uzatılıp atırǵan hár bir xabar tek ǵana bul waqıya haqqında emes, al mámleketimizdiń imidji haqqında da sóz etpekte.

Ikrom AVVALBOEV,
Otabek MIRSOATOV (súwret),
ÓzAnıń xabarshıları