Samarqand qalasında YuNESKO Bas konferenciyasınıń 43-sessiyası ilajları dawam etpekte. Búgin ótkerilgen gezektegi jalpı májiliste elimizde ámeliy sapar menen bolıp turǵan Slovakiya Respublikası Prezidenti Peter Pellegrini shıǵıp sóyledi.

– Búgin biz mádeniyatlar kesilispesinde jaylasqan tariyxıy Samarqand qalasında dúnya ózgerip atırǵan bir waqıtta ushırasıp turmız. Tariyxıy dástúr hám qádiriyatlar joǵalıp barmaqta, globallıq tártiptiń tiykarı bolǵan xalıqaralıq huqıq basım astında. Bunday jaǵdayda YuNESKO qádiriyatlardı qásterlep saqlap, búgingi turmıs hám ámeliyat penen baylanıstıratuǵın siyrek ushırasatuǵın platforma bolıp qalmaqta. Házirgi waqıtta mámleketler ushın kóp tárepleme birge islesiw sawlat yamasa qúdiret emes, al zárúrlik ekeni ayqın kózge taslanbaqta.
Burınǵı bilimlendiriw ministri sıpatında bilimlendiriw dúnyadaǵı barlıq xalıqlar ushın tınıshlıqqa alıp baratuǵın jol ekenin atap ótpekshimen. Ol tek bilim emes, al húrmet, keńpeyillik, tilekleslikti úyretedi. Bilimlendiriwsiz tınıshlıq, tınıshsızlıq rawajlanıw joq. Sonıń ushın da Slovakiya YuNESKOnıń jańa – “Tınıshlıq ushın bilimlendiriw” baǵdarlamasın qollap-quwatlaydı. Bul negizgi ideyanı qayta tikleydi. Bilimlendiriw turmıstı hám jámiyetti ózgerte aladı, ol tek ǵana siyasat emes, al tınıshlıqqa hám insan ruwxıylıǵına qoyılǵan investiciya bolıp esaplanadı.
Biz sistemanı jáne de inklyuziv, dóretiwshilik hám keleshekke baǵdarlanǵan tárizde reformalamaqshımız. Biz muǵallimlerdi tayarlaymız hám jaslar keleshekke isenim menen qarawı ushın sanlı kónlikpelerdi rawajlandırıwǵa itibar qaratamız. Usı maqsette noyabr ayınıń aqırında paytaxtımız Bratislavada Ekonomikalıq birge islesiw hám rawajlanıw shólkemi menen birgelikte bilimlendiriw hám jasalma intellekt boyınsha globallıq forum ótkermekshimiz. Onda jasalma intellekt boyınsha pikir alısamız. Biziń pikirimizshe, búgin jasalma intellektke imkaniyat, sonıń menen birge mashqala sıpatında baha beriw kerek.
Bul baǵdarda YuNESKOnıń jasalma intellektti mektep hám jámiyette qollanıw jáne bul baǵdarda anıq ádep-ikramlılıq qádiriyatlardı islep shıǵıw boyınsha baslamaların maqullaymız. Nátiyjede, qaǵıydalar adamlardı qorǵaydı, rawajlanıwdı toqtatpaydı. Slovakiya jasalma intellektke mine usınday teń salmaqlılıqtı itibarǵa alǵan halda mekteplerimiz insanıy, texnologiyalarımız bolsa juwapkershilikli bolıwı ushın investiciya kirgizedi, dedi Slovakiya Prezidenti hám YuNESKO bárqulla insannıń qálbin hám mádeniyatın qorǵaǵanın, materiallıq hám materiallıq emes miyrastı saqlaw arqalı ózligimizdi hám hár túrliligimizdi saqlap qalıwımızdı ayrıqsha atap ótti.

ÓzA