Ózbekstan Respublikası Prezidentiniń ómirlik joldası Ziroat Mirziyoeva hám Serbiya Respublikası Prezidentiniń ómirlik joldası Tamara Vuchich birgelikte Tashkent wálayatı Qibray rayonındaǵı reabilitaciya orayına iye bolǵan “Imkan” kóp tarmaqlı qánigelestirilgen mektepke shekemgi bilimlendiriw mákemesine bardı.

Miymanlardı oraydıń qánigeleri kútip alıp, bul jerde ayrıqsha kútimge mútáj balalardıń hár tárepleme rawajlanıwı ushın jaratılǵan sharayatlar haqqında aytıp berdi. “Imkan” orayı balalar baqshası, logopediyalıq hám psixologiyalıq járdem, sonday-aq, medicinalıq hám sociallıq reabilitaciyanı óz ishine aladı.
Tanısıw dawamında Ziroat Mirziyoeva hám Tamara Vuchich balalar, tárbiyashılar hám ata-analar menen sáwbetlesip, bunday mákemelerdiń inklyuziv jámiyetti bekkemlewdegi áhmiyetin atap ótti.
Ózbekstannıń Birinshi xanımı inklyuziv bilimlendiriw sistemasın rawajlandırıw balalar huqıqların qorǵawdıń áhmiyetli baǵdarlarınan biri ekenin atap ótti. Óz gezeginde, Serbiya Prezidentiniń ómirlik joldası Ózbekstanda ayrıqsha kútimge mútáj balalarǵa kórsetilip atırǵan itibar hám ǵamqorlıqtan tań qalǵanın bildirdi jáne oraydıń jumısın joqarı bahaladı.

ÓzA