Sońǵı kúnlerde sociallıq tarmaqlarda 30-oktyabrden baslap Tashkent qalasındaǵı mekteplerde medicinalıq nıqap taǵıw tártibi engizilip atırǵanı haqqında xabarlar tarqaldı.

Densawlıqtı saqlaw ministrligi bul maǵlıwmatlarǵa túsinik berip, tarqalǵan xabarlar tiykarsız ekenin málim etti.
Sanitariyalıq-epidemiologiyalıq tınıshlıq hám jámiyetlik salamatlıq komiteti baslıǵınıń birinshi orınbasarı Nurmat Otabekovtıń sózlerine bola, sociallıq tarmaqlarda bul másele nadurıs talqılanbaqta. Olarda Ózbekstan Respublikası Bas mámleketlik sanitariyalıq shıpakeri tárepinen bıyıl 26-sentyabrde qabıl etilgen qarar tiykar etip kórsetilip atır. Biraq hújjet sentyabr ayında, yaǵnıy máwsimlik ótkir respirator kesellikler hám gripp háwij alıwınan aldın qabıl etilgen. Bul hár jılı ámelge asırılatuǵın ádettegi profilaktikalıq ilajlardan bolıp, qararda epidemiyalıq jaǵday qıyınlasqan jaǵdayda ǵana medicinalıq nıqap taǵıw usınıs etilgen.
– Házirgi waqıtta epidemiologiyalıq jaǵday turaqlı, sonıń ushın mekteplerde ǵalaba maska taǵıwǵa zárúrlik joq. Eger qaysıdur klass yamasa toparda keselleniw jaǵdayları dizimge alınsa, sol ortalıqtaǵılarǵa nıqap taǵıw usınıs etiledi, -dedi N.Otabekov.
Maǵlıwmat ushın aytıw kerek, qánigeler hawa-tamshı jolı arqalı juǵatuǵın keselliklerden qorǵanıw ushın sociallıq aralıqtı saqlaw hám sóylesiw waqtında medicinalıq nıqap taǵıwdı paydalı dep esaplaydı.
Densawlıqtı saqlaw ministrliginiń maǵlıwmatına bola, hújjette názerde tutılǵan nıqap taǵıw tártibi orınlardaǵı real epidemiyalıq jaǵdaydan kelip shıǵıp ámelge asırıladı. Onı jalpı túrde engizilgen ilaj sıpatında talqılaw durıs emes.
Sonlıqtan, bul qarar jıllıq profilaktikalıq hújjet bolıp, epidemiologiyalıq jaǵdayǵa qarap tiyisli ilajlardı belgilew ushın mólsherlengen.

ÓzA