Búgin insanlar pursat tulparın qamshılap jasamaqta. Aǵıs bolsa jedelli. Átirapqa názer salsańız, arqayın adamdı tabıw qıyın. Bunıń aqıbetinde bolsa ayırım áhmiyetli faktorlar itibardan shette qalıp atırǵanday.

Hár kim bala-shaǵa, ruwzıgershilik dep zır juwıradı. Biraq, hámme de perzentlerdiń tálim-tárbiyasına ayrıqsha áhmiyet bermekteme?
Bul awır soraw. Sebebi, balanıń ómirge bolǵan dáslepki kózqarasları áyne shańaraqta qáliplesedi. Sebebi, dana xalqımızda “Qus uyasında kórgenin isleydi”, degen naqıl biykarǵa aytılmaǵan.
Tilekke qarsı, búgingi kúnde perzent keleshegi ushın tek ǵana ustazlar juwapker, degen kózqarastı alǵa qoyıp atırǵan ata-analar da ushıraspaqta. Hátteki, mámleketimiz basshısı da balanıń tárbiyası, bilim alıwı ushın bárinen burın ata-ana juwapker, dep atap ótpekte.
– Hár bir tabısqa erisken insannıń artında birinshi gezekte onıń ata-anası turadı. Negizinde tárbiya bilimlendiriwden ústin. Ol bolsa shańaraqta qáliplesedi. Muǵallimniń tiykarǵı wazıypası bilim beriwden ibarat. Eger oqıwshıda bilim alıwǵa muhabbat hám tárbiya qáliplespegen bolsa, sabaq tamam bolǵanın bildiriwshi qońıraw shalınıwı menen bala sabaqtı da, ulıwma, hámme nárseni umıtıp, ázeliy halına qaytadı. Álbette, muǵallimge de kóp nárse baylanıslı. Ol óz tarawınıń shın mánisinde iyesi bolıwı lazım. Sapalı qánige ǵana sapalı sabaq shólkemlestire aladı. Biraq ustaz tálim-tárbiya berse de, bala ala almasa, onda muǵallim ayıplı dep oylamayman, – deydi Samarqand wálayatı Aqdárya rayonındaǵı 40-sanlı ulıwma bilim beriw mektebiniń muǵallimi Bahrillo Berdiev.
Mámleketimizde bilimlendiriwge bolǵan itibar barǵan sayın kúsheyip atırǵanın atap ótiw kerek. Jas áwlad Watanımız kelesheginiń múnásip dóretiwshileri sıpatında kamalǵa keliwi ushın keń imkaniyatlar jaratılmaqta. Bunda bolsa muǵallimler áhmiyetli orın iyelewi tábiyǵıy.
Sonıń ushın da, olardıń jámiyettegi abırayı arttırılmaqta. Biraq joqarıda atap ótkenimizdey, bárinen burın bunday reformalardıń áhmiyetin ata-analar jaqsı túsiniwi kerek. Sonda ǵana Prezidentimiz alǵa qoyıp atırǵan joqarı baslamalar óziniń ámeliy nátiyjesin beredi.

Sherbek Islomov, ÓzA