Ózbekstan musılmanları basqarması baslıǵınıń orınbasarları Z.Eshonqulov, O.Qodirov, basqarmanıń bólim baslıqları I.Zuhriddinov hám M.Kamalovlar Qaraqalpaqstan musılmanları qazıyatı qazısı B.Razov penen paytaxtımızdaǵı «Muhammed ibn Ahmad al Beruniy» atındaǵı orta arnawlı islam bilim jurtında oqıp atırǵan student-jaslar menen ushırastı.

Ushırasıw dawamında ilim-máripat rawajlanıwı jolında jaratılıp atırǵan sharayatlar hám diniy erkinlikler haqqında atap ótildi. Sońǵı jılları musılmanlar ibadatların erkin orınlawı ushın barlıq sharayatlar jaratıldı: jańa meshitler, medreseler qurıldı, ilimiy-aǵartıwshılıq orınlar ashıldı, hár jılı mıńlap jerleslerimiz Haj hám Umra ibadatların orınlaw baxtına miyasar bolıp atırǵanı atap ótildi.
Bunnan soń bilim jurtındaǵı «Quran hám tájwid» kursında oqıp atırǵan eresek jastaǵı studentlerdiń oqıw procesi menen tanıstı.
Miymanlar Oraylıq «Imam iyshan Muhammad» jome meshitinde jámáátlik pesin namazınan soń Qaraqalpaqstan musılmanları qazıyatınıń jumısları menen tanısıp, tarawǵa tiyisli pikir hám usınıslar berdi.
Nókis qalası «Allaniyaz qaharman» máhállesinen jańadan qurılıp atırǵan meshittiń qurılıs jumısların kózden keshirdi, qurılısshı ustalarǵa harmasın ayttı.
Miymanlar sapar dawamında Shımbay rayonındaǵı «Múriwbet» erler internat úyine bardı. Olar múriwbet úyindegi tárbiyalanıwshılar hám miynet jámááti menen ushırasıp, bul jerdegi jaratılǵan sharayatlar menen tanıstı. Qaraqalpaqstan musılmanları qazıyatı hám «Vaqf» qayırqomlıq jámiyetlik fondı tárepinen internat úyi tárbiyalanıwshılarına eki dana kir juwıw mashinası hám úsh dana reńli televizor berildi.
Ushırasıw sońında Alla taaladan múriwbet úyi tárbiyalanıwshılarına densawlıq, jámáát aǵzalarınıń jumıslarında tabıslar tilep, iygilikli duwalar etildi.

Qaraqalpaqstan xabar agentligi.