Xalıqtıń tábiyǵıy gazden nátiyjeli paydalanıwı ushın tutınıwshılarǵa qolaylı sharayatlar jaratıw elimizde belgilep alınǵan wazıypalardıń áhmiyetli baǵdarlarınan birine aylandı. Ásirese, sońǵı jılları tarawda jańa avtomatlastırılǵan sistema engizilgeni bul baǵdardaǵı jumıslardıń nátiyjeliligin jáne de arttırmaqta.

Házirde tábiyǵıy gaz támiynatında engizilgen jańa sistemaǵa bola, tolıq «aqıllı» esaplaǵısh ornatılǵan aymaqlarda gaz támiynatı eki basqıshlı proceske ótkerilmekte. Bunda gaz bólistiriw qurılmaları alınıp, olardıń wazıypasın zamanagóy gaz esaplaǵıshlardaǵı regulyator qurılmaları orınlamaqta. Atap aytqanda, Xojeli rayonında bıyılǵı jılı 1 mıń 800 den aslam xojalıqqa regulyatorlar ornatıw belgilengen bolsa, sonnan usı kúnge shekem 1 mıń 400 xojalıqtıń gaz bólistiriw qurılması demontajlanıp, máhállelerdiń gaz támiynatı tolıq eki basqıshlı sistemaǵa ótkerilgen.
– Qánigelerimiz gúzgi-qısqı máwsimge tayarlıq jumısları menen bir qatarda gaz támiynatın modernizaciyalaw, xojalıqlardı eki basqıshlı sistemaǵa ótkeriw jumısların da alıp barmaqta, – deydi «Hududgaz Qoraqalpoǵiston» gaz támiynatı filialı jetekshi injeneri R.Ǵarrıbaev. – Bıyılǵı jılı respublika boyınsha 25 mıń 573 xojalıqtı eki basqıshlı sistemaǵa ótkeriw rejelestirilgen. Rejede belgilep alınǵan bul jumıslar tolıq juwmaqlansa gaz támiynatındaǵı texnologiyalıq joǵaltıwlardıń aldı alınadı.
Rayondaǵı zamanagóy esaplaǵıshlar ornatıp bolınǵan máhállelerde gaz bólistiriw punktlerin demontajlaw hám gaz támiynatın eki basqıshlı sistemaǵa ótkeriw dawam etpekte.

Qaraqalpaqstan xabar agentligi