Samarqand YuNESKOnıń dúnyadaǵı eń abıraylı, hár bir mámleket ótkere almaytuǵın konferenciyasına basshılıq etpekte.

Házir qala kóshelerinde háreket salıstırmalı sheklengen, miymanxanalar tolı. Ádettegi turmıs tártibi biraz ózgergen. Eń áhmiyetlisi, samarqandlılar bul xalıqaralıq ilajdıń hár bir sekundı mámleketimizdiń abırayına xızmet etip atırǵanın jaqsı ańlap turıptı.
Házir 190 nan aslam mámleket wákilleri, YuNESKO jetekshileri, ilimpazlar hám jurnalistler usı jerde. Ilaj qatnasıwshılarınıń ayırımları menen sáwbetlestik. Tómende olardıń pikirlerin keltiremiz.
– Ózbekstan óziniń bay tariyxın dúnyaǵa kórsetpekte, – deydi Gruziya sırtqı isler ministri Maka Bochorishvili. – Biz de mámleketimizdiń mádeniy miyrası menen maqtanamız. YuNESKO sheńberinde xalıqaralıq birge islesiwge úlken itibar qaratamız. Tariyxı hám mádeniyatı joqarı tiykar sıpatında biybaha miyrastı xalıqaralıq jámiyetshilik penen bólisiw biz ushın oǵada áhmiyetli. Bul konferenciya mádeniyat haqqında pikir alısıw, túrli xalıqlar hám mámleketlerdi mádeniyat arqalı birlestiriw imkaniyatın beretuǵın ájayıp maydan bolmaqta. Bul jerde áhmiyetli máseleler boyınsha pikir alısıp atırmız. Tiykarǵı maqsetimiz milliy mádeniy miyrastı qásterlep saqlaw, bilimlendiriw tarawında birge islesiwdi rawajlandırıw hám global mashqalalarǵa birgelikte sheshim tabıw bolıp tabıladı.
Ánjuman qatnasıwshıları tek ǵana ushırasıw ushın emes, al Ózbekstan qanday mámleket ekenin óz kózleri menen kóriw ushın da kelgen. Bul jerde elimiz haqqında jańa pikirler, jańa tásirler qáliplespekte. Mámleketimizdiń dańqı dúnyaǵa keńnen jayılmaqta.
– Ózbekstannıń bul konferenciyaǵa basshılıq etiwi oǵada joqarı dárejede ótpekte, – deydi YuNESKOnıń Jańa Zelandiyadaǵı Milliy komissiyasınıń wákili Isaak King Moruga. – Bul ánjumanda men eki áhmiyetli baslamanı alǵa qoydım. Bárinen burın, áwladlar arasındaǵı qarım-qatnastı kúsheytiw zárúrligin atap óttim. Bul jámiyetimiz aldında turǵan eń áhmiyetli máselelerden biri. Atap aytqanda, klimat ózgeriwi mashqalasın sheshiwde jaslar hám úlken áwlad birgelikte islewi kerek. Bul processte barlıq tárepler óz juwapkershiligin sezinip, jáne de belsendi bolıwı kerek.
Ekinshi baslamam tómendegishe. Usı ilajlar sheńberinde YuNESKO Jaslar forumı da bolıp ótti. Onda 140 mámleketten 150 jas delegat qatnastı. Biraq olardıń barlıǵı da óz elindegi YuNESKOnıń Milliy komissiyası menen úzliksiz baylanısqa iye emes. Sonıń ushın jaslar islep shıqqan ideya hám baslamalardıń forumnan keyin de ámelge asıwın qáleymiz. Bunıń ushın Milliy komissiyalar menen tıǵız birge islesiw ornatıw zárúr. Usı jerde ózbekstanlı jaslardıń forumdaǵı belsene qatnasıwın ayrıqsha atap ótiw kerek. Olar mámlekettiń túrli aymaqlarınan kelip, delegatlar ushın qolaylı sharayat jarattı. Ózbekstannıń bay tariyxı, mádeniyatı hám miymandoslıǵın shın kewilden kórsetti. Bul bolsa forumǵa jıllılıq, qızǵınlıq hám ózine tán ruwx baǵıshladı.
Bunday ánjumanlar mámleketimizdiń keleshektegi abırayına tásir etedi. Ózbekstanda turizm rawajlanadı. Xalıqaralıq dárejede isenim artadı. Bunı hesh nárse menen satıp alıp bolmaydı.
– Ózbek xalqınıń miymandoslıǵına, keńpeyilligine hám bul úlken ilajdı joqarı dárejede shólkemlestirilgenine tań qalamız, – deydi YuNESKOnıń Niderlandiyadaǵı Milliy komissiyasınıń wákili Kazleen Gertrud Ferrier. – Samarqand oǵada gózzal, tariyxıy qala eken. Biz ushın jaslardıń qarar qabıl etiw processlerinde belsene qatnasıwı oǵada áhmiyetli. Usı konferenciya sheńberinde ótken YuNESKO Jaslar forumında 140 tan aslam mámleketten kelgen jaslar da pikir alıstı. Bul jaslardıń dawısın esitiw, olardı siyasiy hám jámiyetlik turmısqa tartıw baǵdarında áhmiyetli qádem boldı. Hár bir insan, ol qanday mádeniyat, din yamasa kózqaraslarǵa tiyisli bolıwına qaramastan, ózin jámiyettiń ajıralmas bólegi sıpatında seziwi zárúr.
YuNESKOnıń tiykarǵı maqseti de insanlar sanasında tınıshlıqtı bekkemlew bolıp tabıladı. Bul maqsetke insanlardı birlestiriwshi qádiriyatlardı bekkemlew arqalı erisiliwi ayrıqsha áhmiyetke iye.

Ikrom AVVALBOEV,
Otabek MIRSOATOV(surat),
ÓzAnıń xabarshıları