Prezident Shavkat Mirziyoev 29-oktyabr kúni sociallıq qamsızlandırıw sistemasın jetilistiriw boyınsha usınıslar prezentaciyası menen tanıstı.

“Kámbaǵallıqtan abadanlıqqa qaray” baǵdarlaması sheńberinde puqaralardıń bántligin támiyinlew hám olardı isbilermenlikke tartıw boyınsha ámelge asırılıp atırǵan reformalar nátiyjesinde kámbaǵallıq dárejesi 2021-jıldaǵı 17 procentten 6,8 procentke, kem támiyinlengen shańaraq sıpatında napaqa alıwshılardıń sanı bolsa 14 procentten 6,1 procentke azaydı.
Sonıń menen birge, búgingi kúnde xalıqtıń awır turmıslıq jaǵdaylarda dáramatsız qalıwı hám kámbaǵallıqqa túsiwiniń aldın alıw máseleleri mámleketimizdiń turaqlı itibarında.
Prezentaciyada bul baǵdardaǵı áhmiyetli máseleler kórsetip ótildi.
Sonıń ishinde, jeke menshik sektorda bánt bolǵan xalıqtıń hámmesine de hámiledarlıq, waqtınsha miynetke jaramsızlıq hám jumıstan bosaw boyınsha napaqalar tólep berilmey atır. Bul jaǵdaydı tólemler kóp jaǵdaylarda islep shıǵarılatuǵın ónimniń ózine túser bahasınıń artıwına alıp kelip atırǵanı hám básekige shıdamlılıqqa tásir kórsetip atırǵanı, jumıs beriwshiler napaqalardı tólewge artıqsha júkleme sıpatında qarap atırǵanı sebepli isbilermenler ushın bul sistema tartımlı emesligi menen túsindiriw múmkin.
Qalaberdi, Xalıqaralıq miynet shólkeminiń “Sociallıq támiynattıń minimal normaları haqqında”ǵı hám “Analıqtı qorǵaw haqqında”ǵı konvenciyalarına muwapıq, tuwıw hám kesellik boyınsha napaqalar sociallıq qamsızlandırıw mexanizmleri arqalı tóleniwi belgilengen.
Prezentaciyada xalıqtı sociallıq napaqalar menen qamtıp alıwdı arttırıw hám milliy sociallıq qamsızlandırıw sistemasın xalıqaralıq hújjetlerge beyimlestiriw maqsetinde islep shıǵılǵan usınıslar kórip shıǵıldı.
Rásmiy bánt bolǵan barlıq shaxslarǵa napaqalar basqıshpa-basqısh Sociallıq qorǵaw qorı tárepinen tóleniwi jolǵa qoyıladı. 2026-jıldan baslap hayallarǵa hámiledarlıq napaqası, 2026-jıldıń ekinshi yarımınan bolsa waqıtsha miynetke jaramsızlıq napaqaları tólep barıladı.
Jańa sistemanıń tiykarǵı maqseti hayal-qızlar hám jumısshılardıń sociallıq qorǵalıwın kúsheytiw menen birge rásmiy miynet qatnasıqların xoshametlew ekeni atap ótildi.
Prezidentimiz usınıslardı maqullap, sociallıq qamsızlandırıw tarawın sanlastırıw, sistemanıń ashıq-aydın islewin, napaqalar proaktiv túrde tayınlanıp, tólep barılıwın támiyinlew boyınsha anıq tapsırmalar berdi.

ÓzA