Ózbekstan Respublikası Prezidenti Shavkat Mirziyoevtiń mirát etiwine bola Finlyandiya Respublikası Prezidenti Aleksandr Stubb 29-oktyabr kúni rásmiy sapar menen mámleketimizge keldi.

Joqarı mártebeli miymandı Tashkent xalıqaralıq aeroportında Ózbekstan Respublikası Bas ministriniń orınbasarı Jamshid Xwjaev hám basqa da rásmiyler kútip aldı.

Sapardıń baǵdarlamasına muwapıq, Tashkent qalasında joqarı dárejedegi sóylesiwler bolıp ótedi, olarda Ózbekstan menen Finlyandiya arasındaǵı kóp táreplemeli birge islesiwdi, bárinen burın, siyasiy, sawda-ekonomikalıq, investiciyalıq hám mádeniy-gumanitarlıq tarawlarda jáne de keńeytiwdiń áhmiyetli máseleleri kórip shıǵıladı.

Óz-ara sawda kólemin arttırıw, awıl xojalıǵı, ekologiya, ximiya, energetika, sanlastırıw, taw-kán sanaatı hám basqa da innovaciyalıq tarmaqlarda kooperaciyanı jolǵa qoyıwǵa ayrıqsha itibar qaratıladı.

Miynet migraciyası, mádeniyat, bilimlendiriw sistemasına aldınǵı texnologiyalardı engiziw tarawlarında birge islesiw máseleleri kórip shıǵıladı.

Xalıqaralıq áhmiyetke iye aktual máseleler, sonıń ishinde, kóp tárepleme strukturalarda óz-ara qollap-quwatlaw boyınsha da pikir alısadı.

ÓzA