Mámleketimiz basshısınıń mirát etiwine bola mámleketimizde rásmiy sapar menen bolıp turǵan Serbiya Respublikası Prezidenti Aleksandr Vuchich Ózbekstan Sanlı texnologiyalar ministrligine bardı. Joqarı mártebeli miymandı ministr Sherzod Shermatov basshılıǵındaǵı juwapkerler qızǵın kútip aldı.

Rásmiy ushırasıw aldınan Sanlı texnologiyalar ministrliginiń jumısı, mámleketimizde sanlastırıw procesiniń barısı hám “Sanlı Ózbekstan – 2030” strategiyası sheńberinde ámelge asırılıp atırǵan keń kólemli jumıslar haqqında videorolik kórsetildi.
Prezentaciyada elektron húkimet sistemasın jetilistiriw, IT-bilimlendiriwdi rawajlandırıw, málimleme qáwipsizligin támiyinlew hám sanlı infrastrukturanı keńeytiw baǵdarında erisilgen nátiyjeler sáwlelengen.
Prezident Aleksandr Vuchich elimizde keń kólemli sanlı transformaciya procesi jedel ótip atırǵanına toqtap, bul baǵdardaǵı mámleketlik siyasat hám baslamalardıń izbe-izligin atap ótti. Sonday-aq, Serbiya hám Ózbekstan arasında usı baǵdarda tájiriybe almasıw, birgelikte texnoparkler shólkemlestiriw hám jas qánigeler almasıwın jolǵa qoyıw áhmiyetli ekenligin atap ótti.
Miymanlar “IT Park” jumısı, sanlı xızmetler orayları, elektron húkimet sistemasınıń islew mexanizmi hám jas programmistler ushın jaratılǵan sharayatlar menen de tanıstı.
Bul ushırasıw Ózbekstan hám Serbiya arasındaǵı siyasiy, ekonomikalıq hám gumanitarlıq tarawlardaǵı baylanıslardı jańa basqıshqa alıp shıǵıwǵa xızmet etedi. Sanlı texnologiyalar baǵdarındaǵı óz-ara sóylesiw bolsa eki mámleket arasında ornatılǵan zamanagóy birge islesiw kópirin jáne de bekkemleytuǵını sózsiz.

Musılman ZIYo,
Muhammad AMIN (súwret), ÓzA