Oraylıq bank basqarmasınıń “Bank xızmetleri tutınıwshıları menen óz-ara qatnasıqlardı ámelge asırıwda kommerciyalıq banklerdiń jumısına qoyılatuǵın minimal talaplar haqqındaǵı rejege ózgeris hám qosımsha kirgiziw haqqında”ǵı qararı Ádillik ministrliginde 2025-jıl 28-oktyabr kúni 3030-11-san menen mámleketlik dizimnen ótkerildi.

Usı rejege kirgizilgen ózgerisler hám qosımshalar menen tómendegi tiykarǵı talaplar engizilmekte:
• bankler tárepinen qarız alıwshı fizikalıq táreplerge kredit minnetlemeleri menen baylanıslı bolıwı múmkin bolǵan qáwip-qáterler haqqında maǵlıwmat beriliwin názerde tutatuǵın standart chek-list túri ámeliyatqa engizilmekte. Bul chek-list qarız alıwshılarǵa kredit penen baylanıslı minnetlemeler hám itimallıq qáwip-qáterler haqqında aldınnan túsinik berip, olardı juwapkershilikli qarar qabıl etiwge iytermeleydi;
• finanslıq qıyınshılıq sebepli kredit tólemlerin óz waqtında tólewde qıynalıp atırǵan qarız alıwshılardıń ámeldegi kredit shártnamasına ózgeris kirgiziw boyınsha banktiń ishki tártibi bolıwı hám onı tutınıwshılarǵa járiyalaw talabı belgilenbekte. Bul talap klientlerdi qıyın jaǵdaylarda qollap-quwatlaw sistemasın rawajlandırıw, kreditti restrukturizciyalaw processlerin ashıq-aydın etiw hám anıq qaǵıydalardı qáliplestiriwge xızmet etedi;
• ayırım insapsız ámeliyatlardı sheklew, atap aytqanda, tutınıwshılardı olardıń sorawında kórsetilgen muǵdardan artıq kredit alıwǵa shaqırmaw, mámleket tárepinen ajıratılatuǵın sociallıq napaqa hám járdem qarjılarına qarızdarlıqtı qaratpaw hám kredit tólemlerin kestede belgilengen sánege shekem talap etpew belgilenbekte. Bul normalar xalıqtıń artıqsha qarız alıwınıń aldın aladı hám sociallıq qorǵawǵa mútáj puqaralardı qollap-quwatlaydı;
• finanslıq xızmetler kórsetilgende tutınıwshınıń qálewin bildiretuǵın hár qanday belgilerdi aldınnan ornatıw yamasa tańlap qoyıw, kredit parametrlerin aldınnan toltırıw sheklenbekte. Bul bolsa tutınıwshılardıń qarar qabıl etiw erkinligin támiyinleydi hám bank xızmetleri shártlerin ashıq-aydın etedi;
• kommerciyalıq bankler tárepinen tutınıwshılarǵa amanatlarǵa kepillik beriw sisteması, kepillik beriletuǵın amanattıń túrleri hám muǵdarı, kompensaciya beriw tártibi hám onı tólew múddetleri haqqında tolıq maǵlıwmat beriw talabı engizilmekte. Bul talap xalıqtıń amanat qáwipsizligi haqqındaǵı xabardarlıǵın arttıradı hám bank sistemasına isenimdi bekkemleydi.
Rejege kirgizilgen ózgerisler hám qosımshalar 2026-jıl 29-yanvardan kúshke kiredi, – dep málimleme beredi xabar.uz saytı.

Qaraqalpaqstan xabar agentligi