Salıq komitetiniń maǵlıwmatlarına bola, 2025-jıldıń yanvar-sentyabr aylarında Ózbekstanda elektron xızmetler kórsetiwshi 73 sırt el kompaniyası tárepinen jámi 124,8 milliard sum salıq tólengen.

Bul kórsetkish ótken jıldıń usı dáwirine salıstırǵanda 44 procentke kóp.
Maǵlıwmat ushın, bul salıqlardıń 93 procenti tek ǵana 10 iri kompaniya úlesine tuwra kelgen. Meta – 35,2 milliard sum, Apple – 35,1 milliard sum, Google – 31,2 milliard sum, OpenAI – 4,7 milliard sum, Booking.com (https://booking.com/) – 2,9 milliard sum, TikTok – 2,6 milliard sum, Netflix – 1,3 milliard sum, Assa – 1,1 milliard sum, Zoom – 1,1 milliard sum, Adobe – 1 milliard sum salıq tólegen.
“Google salıǵı” dep atalatuǵın bul tólem túri 2020-jıl 1-yanvardan kúshke kirgen bolıp, ol internet arqalı kórsetiletuǵın elektron xızmetler (baǵdarlamalıq támiynat, onlayn oyınlar, elektron kitaplar, muzıka hám oqıw materiallarınan paydalanıw huqıqı) ushın óndiriledi.
Sırt el internet kompaniyaları salıq tólewshi sıpatında arnawlı QQS ofisinde dizimnen ótedi hám hár sherek juwmaqlanǵannan keyingi aydıń 20-sánesine shekem esabat tapsıradı.
Esletip ótemiz, 2025-jıldıń birinshi yarım jıllıǵında da bul kompaniyalar tárepinen 78,2 milliard sum salıq tólengen – bul da 2024-jılǵa salıstırǵanda 42 procentke kóp edi.

Sh.Mamaturopova, ÓzA