Ózbekstan Respublikası Prezidenti Shavkat Mirziyoevtiń mirát etiwine bola Serbiya Respublikası Prezidenti Aleksandr Vuchich rásmiy sapar menen mámleketimizde bolıp tur.

Serbiya Respublikası Prezidenti Aleksandr Vuchich ómirlik joldası menen 29-oktyabr kúni Tashkent qalasında qurılǵan, Islam arxitekturasınıń haqıyqıy dúrdanaları hám Ózbekstannıń Úshinshi oyanıw dáwiriniń tımsalı esaplanǵan Islam civilizaciyası orayına bardı.
Joqarı mártebeli miymanǵa Bas ministrdiń orınbasarı O.Ramatov hám oraydıń basshıları, ilimpazlar menen birgelikte, dúnyada teńi-tayı joq bul úlken arxitekturalıq kompleks jáne onıń dúnya ilimindegi hám islam dúnyasındaǵı ornı haqqında tolıq maǵlıwmat berildi.
Prezident Aleksandr Vuchich oraydıń muzeyi, kórgizbe zalları, arxiv, málimleme texnologiyaları orayı, qoljazbalar bólimi, kalligrafiya hám islam miyrasın saqlawǵa qaratılǵan infrastrukturalar menen tanıstı.
Sonday-aq, oray aymaǵında shólkemlestirilgen Islam akademiyası, málimleme-resurs orayı, konferenciya zalı hám basqa da imaratlar ózine tán arxitekturalıq usılda qurılǵanı menen miymanlarda úlken tásir qaldırdı.
Zamanagóy qala qurılısı sharayatında bunday arxitekturalıq esteliklerdiń áhmiyeti, Oraydıń maqset hám wazıypaları haqqında da hár tárepleme maǵlıwmat berildi.
Áyyemgi arxitekturalıq dástúrler hám milliy naǵıslardıń úylesimliliginde qurılǵan, tórt tárepinde biyikligi 34 metrli arkalar, orayda bolsa 65 metrli milliy usıldaǵı gúmbez qurılǵan bul imarattıń sawlatı miymanlardı ózine tarttı.
Prezident Aleksandr Vuchich oraydaǵı ekspoziciyalar menen tanısıp, xalqımızdıń bay tariyxıy hám ruwxıy miyrasın keńnen kórsetiwge qaratılǵan bunday jumıslar joqarı nátiyje beretuǵınına isenim bildirdi.

Abdulaziz RUSTAMOV,
Rustam NAZARMATOV (súwret), ÓzA