Sveta Tóreeva – Qaraózek rayonı medicina birlespesine qaraslı kóp tarmaqlı poliklinikasında lor shıpakeri bolıp islep atırǵan tájiriybeli qánige. Shıpakerdiń basıp ótken ómiri hám miynet jolı búgingi jas áwladqa órnek bola aladı.

Tuwdı-pitti qaraózekli bolǵan Sveta óz qızıǵıwshılıǵına bola 1989-jılı Astraxan mámleketlik medicina institutına oqıwǵa kiredi hám 3-kursında shańaraqlıq sharayat sebepli, oqıwın Tashkent pediatriya medicina institutı Nókis filialına kóshiredi. 1996-jılı usı joqarı oqıw ornın tabıslı tamamlap, Qaraózek rayonlıq medicina birlespesinde pediatr shıpaker bolıp miynet jolın baslaǵan ol, waqıt ótiwi menen densawlıqtı saqlaw tarawındaǵı bilimlerin jáne de tereńlestiriwge umtıladı.
Sonlıqtan ol keyin ala Sveta Tóreeva Densawlıqtı saqlaw ministrliginiń jollaması menen lor qánigeligi boyınsha Tashkentte 6 ay dawamında oqıp, medicinanıń bul áhmiyetli tarawında óz qánigeligi hám bilimlerin bekkemledi. Sońınan ol Qaraózek rayonındaǵı kóp tarmaqlı poliklinikada lor shıpakeri sıpatında jumısqa ornalasadı hám bul qánigelik boyınsha iyelegen bilim hám tájiriybesin ámeliyatta qollana baslaydı.
Sveta Tóreeva tek ǵana bilimli hám tájiriybeli qánige emes, al shańaraqlıq turmısta da úlgili insan. Ol Najimatdin ismli jigit penen turmıs qurıp, 3 perzentli boladı.
«Anaǵa qaray qız ósedi» degenindey onıń qızı – Gúlziyba, anasınıń izinen barıp, házirgi waqıtta Buxara mámleketlik medicina institutında bilim almaqta. Bul álbette, Sveta Tóreeva ushın úlken maqtanısh bolıp, óziniń bilim hám tájiriybelerin keleshek áwladqa jetkeriwde oǵan jáne de kóbirek kúsh-jiger baǵıshlaydı.
– Kúnniń salqınlasıwı menen balalar arasında tamaq keselligi menen awırǵanlar kóbeyip ketedi, – deydi Sveta Tóreeva. – Sońǵı waqıtları medicina tarawına qaratılıp atırǵan ayrıqsha itibardıń nátiyjesinde, Qaraózek rayonı medicina birlespesine de kóplegen jańa apparatura hám úskeneler alıp kelindi. Bul bolsa, medicina xızmetkerlerine úlken jeńillik bolıp, xalıqqa tez hám sapalı xızmet kórsetiwimiz ushın oǵada qolaylı bolmaqta. Bunıń ushın taraw basshılarına úlken raxmet aytaman.
Pidayı shıpaker hám úlgili shańaraq biykesi Sveta Tóreeva lor shıpakeri sıpatında densawlıqtı saqlaw tarawındaǵı áhmiyetli wazıypalardı orınlawda belsene qatnaspaqta. Hár bir shańaraq hám hár bir insannıń densawlıǵı ushın gúresiw, Sveta Tóreeva ushın tek ǵana jumıs wazıypası emes, al, turmıslıq maqsetine aylanǵan. Onıń lor qánigeligindegi joqarı dárejedegi kónlikpeleri hám tájiriybesi, óz kásibin súyiwi Svetanı jáne de alǵa qaray umtıldırmaqta.

Adilbay Orazov,
Qaraqalpaqstan xabar agentligi sholıwshısı.