Ózbekstan Respublikası Prezidenti Shavkat Mirziyoevtiń mirát etiwine bola Serbiya Respublikası Prezidenti Aleksandr Vuchich rásmiy sapar menen mámleketimizde bolıp tur.

Ózbekstan hám Serbiya qatnasıqları búgin jańa mazmunǵa iye bolmaqta. Eki mámleket arasındaǵı sóylesiw tek ǵana eki tárepleme birge islesiw sheńberinde emes, al keń regionallıq baylanıslar sistemasında áhmiyetli orın iyelemekte.
Bul qatnasıqlar Ózbekstan sırtqı siyasatınıń teń salmaqlı hám pragmatikalıq baǵdarın jáne bir márte kórsetpekte. Mámleketimiz keyingi jılları tek ǵana dástúriy birge islesiwshiler menen sheklenip qalmastan, geografiyalıq jaqtan uzaq, biraq ekonomikalıq hám mádeniy jaqtan jaqın bolǵan mámleketler menen de qatnasıqlardı keńeytiwge úlken itibar qaratpaqta. Serbiya menen jaqınlasıw da usınday qatnastıń ámeliy kórinisi bolıp esaplanadı. Bul siyasat tek ǵana ekonomikalıq máplerge emes, al regionlar arasındaǵı siyasiy turaqlılıq hám diplomatiyalıq teńlikke xızmet etedi.
Ekonomikalıq jaqtan qaraǵanda, Ózbekstan – Serbiya birge islesiwi eki tárep ushın da jańa bazarlar esigin ashadı. Mashina qurılısı, farmacevtika, málimleme texnologiyaları hám agrosanaat tarawlarındaǵı sheriklik joybarları ekonomikalıq integraciyanıń áhmiyetli noqatı boladı.
Keleshektegi birge islesiw baǵdarları tek ǵana ekonomika menen sheklenbeydi. Bilimlendiriw, ilim, mádeniyat hám sport tarawlarındaǵı birgeliktegi baǵdarlamalar xalıqlar arasındaǵı doslıq hám óz-ara isenimdi bekkemleydi. Bul processte Ózbekstan sırtqı siyasatınıń ashıq-aydın kózqarası ayqın kózge taslanadı.
Joqarı mártebeli miyman 28-oktyabr kúni “Jańa Ózbekstan” parkine barıp, Ǵárezsizlik monumentine gúl qoydı.
Kompleks penen qısqasha tanısıw dawamında Serbiya delegaciyasınıń wákillerine bul ansambldiń mazmunı hám arxitekturalıq sheshimleri haqqında maǵlıwmat berildi.
“Jańa Ózbekstan” baǵı hám Ǵárezsizlik monumenti ǵárezsizligimizdiń otız jıllıǵına baǵıshlap qurılǵan. Úsh mıń jıldan aslam dáwir – ana Watanımız aymaǵındaǵı milliy mámleketshilik tariyxınıń tamırları sonshelli tereń. Monumentke itibar qaratqan adam mine usı awır ótmishtiń kórkem súwretleniwine gúwa boladı.
Joqarı mártebeli miymanlar, rásmiy sırt el delegaciyalarınıń elimizge saparı sheńberinde bul jerdegi monumentke gúl qoyıw dástúrge aylanǵan.
Delegaciya aǵzaları komplekste sáwlelendirilgen ulamalar, ullı sárkarda hám jáhángirler, jadid babalarımızdıń tulǵalarına ayrıqsha itibar qarattı. Tınıshlıq, erkinlik, jaqsılıq tımsalı bolǵan Qumay qusınıń súwreti komplekstiń misli gúltajı sıyaqlı kórinetuǵını atap ótildi.
Bunnan soń Kóksaray rezidenciyasında Serbiya Respublikası Prezidenti Aleksandr Vuchichtı rásmiy kútip alıw máresimi ótkerildi.
Ózbekstan Respublikası Prezidenti Shavkat Mirziyoev joqarı mártebeli miymandı shın júrekten kútip alıp, minberge mirát etti.
Eki mámlekettiń gimnleri jańladı. Áskeriy orkestr namaları astında jetekshiler húrmetli qarawıl qatarınıń aldınan ótti. Rásmiy delegaciyalar aǵzaların qutlıqladı.
Soń Ózbekstan Respublikası Prezidenti Shavkat Mirziyoev hám Serbiya Respublikası Prezidenti Aleksandr Vuchichtıń rásmiy delegaciyalar qatnasıwındaǵı sóylesiwleri bolıp ótti.
Ózbekstan hám Serbiya arasındaǵı ámeliy birge islesiwdi bunnan bılay da bekkemlewdiń perspektivaları kórip shıǵıldı.
Mámleketimiz basshısı Serbiya jetekshisin qızǵın qutlıqlap, birge islesiw dáwirindegi birinshi sammit tariyxıy áhmiyetke iye bolatuǵının hám Ózbekstan – Serbiya qatnasıqların sapa jaǵınan jańa dárejege alıp shıǵatuǵının atap ótti.
– Diplomatiyalıq qatnasıqlar ornatılǵanınıń 30 jıllıǵı belgilenip atırǵan jılda rásmiy saparıńız tariyxıy waqıya bolıp esaplanadı. Ózbekstan Serbiyaǵa úlken qızıǵıwshılıq penen qaraydı. Xalıqlarımızdı bekkem doslıq baylanısları hám uqsas mentalitet baylanıstırıp turadı, – dedi Ózbekstan Prezidenti.
Sóylesiwlerde tovar almasıwdı kóbeytiw, mashina qurılısı, farmacevtika, ximiya sanaatı, málimleme texnologiyaları hám sanlastırıw, agrosanaat kompleksi, turizm hám kóplegen basqa da áhmiyetli tarmaqlarda keń kólemli kooperaciya baǵdarlamasın tayarlaw máselelerine ayrıqsha itibar qaratıldı.
“Oraylıq Aziya – Balkan” baǵdarında jańa transport koridorların, sonıń ishinde, Transkaspiy koridorı sheńberinde rawajlandırıw áhmiyetli ekenligi atap ótildi.
Birge islesiwdiń ekonomikalıq kún tártibin alǵa qoyıw maqsetinde kelesi jılı Tashkent qalasında Húkimetleraralıq komissiyanıń birinshi májilisin ótkeriwge kelisip alındı.
Tártipli miynet migraciyası, mádeniy-gumanitarlıq hám bilimlendiriw tarawlarındaǵı birge islesiw máseleleri kórip shıǵıldı.
Jetekshiler regionallıq hám xalıqaralıq áhmiyetke iye aktual máseleler boyınsha da pikir alıstı.
Tashkent qalasında bolıp ótken sóylesiwlerdiń juwmaǵında Ózbekstan Respublikası Prezidenti Shavkat Mirziyoev hám Serbiya Respublikası Prezidenti Aleksandr Vuchich Birgeliktegi deklaraciyaǵa qol qoydı.
Jetekshiler janında húkimetleraralıq hám uyımlararalıq hújjetler toplamın qabıllaw máresimi de bolıp ótti. Sonnan:
– Investiciyalardı óz-ara xoshametlew hám qorǵaw haqqında kelisim;
– Ekonomikalıq birge islesiw haqqında kelisim;
– Medicinalıq xızmetler tarawındaǵı birge islesiw haqqında kelisim;
– Turizm tarawındaǵı birge islesiw haqqında kelisim;
– Bilimlendiriw, ilim hám mádeniyat tarawlarındaǵı birge islesiw haqqında kelisim;
– Injenerlik, aldınǵı texnologiyalar, jasalma intellekt hám túrles tarawlardaǵı birge islesiw haqqında kelisim;
– Diplomatiyalıq kadrlar tayarlaw tarawındaǵı birge islesiw haqqında protokol;
– Sırtqı isler ministrlikleri arasındaǵı birge islesiw boyınsha 2026-2027-jıllarǵa mólsherlengen baǵdarlama;
– Miynet migraciyası tarawındaǵı birge islesiw haqqında memorandum;
– Sport hám denetárbiya tarawındaǵı birge islesiw haqqında protokol;
– Tashkent hám Belgrad qalaları arasında sheriklik qatnasıqların ornatıw haqqında kelisim.
Ózbekstan menen Serbiya arasındaǵı joqarı dárejedegi sóylesiwlerdiń juwmaǵında Kóksaray rezidenciyasında terek egiw máresimi boldı.
Húrmetli miymanlar qıyabanında Prezidentler Shavkat Mirziyoev hám Aleksandr Vuchich ellerimiz hám xalıqlarımız arasındaǵı doslıq jáne sheriklik qatnasıqların bekkemlewge, eki tárepleme qatnasıqlar tariyxında jańa bet ashıwǵa birdey umtılıs belgisi sıpatında terek ekti.
Serbiya Respublikası Prezidenti Aleksandr Vuchichtıń elimizge rásmiy saparı dawam etpekte.

Ziyodulla JONIBEKOV,
Ikrom AVVALBOEV,
ÓzAnıń xabarshıları