Prezidentler dárejesindegi rásmiy saparlar mámleketler arasındaǵı qatnasıqlardıń eń joqarı kórinislerinen biri bolıp esaplanadı. Bul tek ǵana protokol máresimi emes. Ol mámlekettiń diplomatiyalıq mádeniyatı, shólkemlestiriwshilik potencialı hám xalıqaralıq abırayın kórsetetuǵın áhmiyetli waqıya bolıp esaplanadı.

Bunday ushırasıwlarda hár bir tárep, hár bir minut dıqqat orayında boladı. Bunda simvol hám máni úylesedi.
Kóksaray rezidenciyasında ótetuǵın rásmiy kútip alıw máresimlerinde húrmetli qarawıl sap tartadı. Eki mámleket bayraqları kóterilgen boladı. Gimnler jańlaǵanda bolsa pútkil maydandı húrmet, qızǵınlıq hám teńlik ruwxı biylep aladı.
Bul jaǵdaylarda hátteki eń mayda bolıp kóringen tárepleri de úlken mánige iye. Qaysı mámlekettiń bayraǵı qaysı tárepte turıwı, qaysı gimn birinshi jańlawı, jetekshiler húrmetli qarawıl aldınan qay tártipte ótiwi – barlıǵı xalıqaralıq protokol talaplarına muwapıq boladı. Bul teńlik hám húrmet belgisi sıpatında belgilengen.
Negizinde, bul máresim diplomatiyalıq dástúrlerdiń bir bólegi esaplanadı. Ol arqalı mámleketler arasındaǵı isenim hám qızǵınlıq dárejesi kórinedi. Mámleket basshısın qalay kútip alıw pútkil mámleketti qalay qádirlew menen teń, desek asıra aytqan bolmaymız. Sonıń ushın da bul máresimlerde joqarı mádeniyat, milliy maqtanısh hám miymandoslıq ruwxı anıq seziledi.
Kóksaray rezidenciyasında 28-oktyabr kúni áne usınday joqarı ruwxtaǵı máresim bolıp ótti. Ózbekstan Respublikası Prezidenti Shavkat Mirziyoev Serbiya Respublikası Prezidenti Aleksandr Vuchichti rásmiy kútip aldı.
Qol berip kórisiw, bayraqlardıń jeńil jelberiwi, gimnlerdiń jańlawı sıyaqlı jaǵdaylar eki xalıq arasındaǵı birge islesiwdiń jańa basqıshınan derek berdi.
Búgingi kúnde Ózbekstan xalıqaralıq maydanda ashıq, tınıshlıqtı súyiwshi hám isenimli sherik sıpatında tán alınbaqta. Bunday rásmiy máresimler bolsa mámleketimizdiń diplomatiyalıq mádeniyatı, abırayı hám sırtqı siyasiy baǵdarındaǵı izbe-izlikti jáne bir márte kórsetedi.

Ikrom AVVALBOEV, ÓzAnıń xabarshısı