Ózbekstan Ekologiyalıq partiyası Moynaq rayonlıq Keńesiniń shólkemlestiriwinde rayondaǵı Aral mákan puqaralar jıyını aymaǵında gezektegi ekologiyalıq reyd ilajları ótkerildi.

Reyd dawamında máhálle aymaǵında alıp barılǵan abadanlastırıw jumısları, terek hám nállerdiń jaǵdayı jáne “Jasıl mákan” baǵdarlaması sheńberinde ámelge asırılǵan ilajlar úyrenildi.
Usı jıldıń báhár máwsiminde aymaqta 200 túpke shamalas sayamanlı hám miyweli náller egilgeni, al házirgi waqıtta olar rayonlıq Abadanlastırıw bólimi tárepinen biriktirilgen arnawlı xızmetkerler tárepinen tárbiyalanıp atırǵanı atap ótildi. Sonıń menen birge, gúzgi-qısqı máwsimge tayarlıq jumısları da basqıshpa-basqısh ámelge asırılmaqta.
Kózden ótkeriw nátiyjeleri boyınsha bar jaǵdaylar talqılanıp, zárúr usınıslar berildi.
Qońırat rayonında da rayonlıq partiya shólkemi Keńesi tárepinen “Jasıl mákan” ulıwma milliy joybarı sheńberinde aymaqlarda nállerdiń jaǵdayın úyreniw, tárbiyalaw processlerin qadaǵalaw hám ekologiyalıq mádeniyattı arttırıw maqsetinde bir qatar ekologiyalıq reydler ótkerildi.
Reydler dawamında Jinishke MPJ daǵı 43-sanlı mektepte usı jıldıń báhár máwsiminde egilgen 375 túp nál (25 túp miyweli terek, 150 dana roza gúl, 200 túp tut)diń jaǵdayı kózden ótkerildi. Suwǵarıw hám tárbiyalaw ilajları talqılanıp, kemshilikler boyınsha usınıslar berildi.
Al, qánigelestirilgen mektep-internatta sayamanlı tereklerdiń ósiwi ushın jaratılǵan sharayatlar da úyrenilip, tárbiyalawdı dawam ettiriw boyınsha kórsetpeler berildi. Bostan MPJ daǵı 11-sanlı baqshada tereklerdi tárbiyalaw boyınsha házirgi jaǵday talqılanıp, jasıl maydanlardı keńeytiw hám olardı saqlaw boyınsha ilajlar belgilendi.
Orınlarda bul baǵdardaǵı ilajlar dawam etpekte.

Qaraqalpaqstan xabar agentligi