“Professional bilimlendiriw sistemasında reformalardı ámelge asırıw ilajları haqqında”ǵı Prezident qararı qabıl etildi. Bul haqqında Bilimlendiriw qadaǵalawı Telegram-kanalı xabar berdi.

Onda aytılıwınsha, bul qararǵa muwapıq, 2030-jılǵa shekem 9-klass pitkeriwshileriniń texnikumlar menen qamtıp alınıwı 29 procentten 50 procentke, dual bilimlendiriw (jumıs ornında oqıtıw) úlesi bolsa 9 procentten 40 procentke jetkeriliwi rejelestirilgen.
Kásipke baǵdarlaw sisteması
2026-jıldan baslap mektepke shekemgi bilimlendiriw mákemelerinen baslap oqıwshılardı kásip tańlawǵa baǵdarlaw sisteması engiziledi. 5 jastan “Átirapımızdaǵı kásipler” oyınları, 1-4-klasslarda “Kásipler álipbesi”, 5-6-klasslarda “Kásipler dúnyası”, 7-9-klasslarda bolsa “Meniń keleshektegi kásibim” pánleri engiziledi. 2028-jıldan 9-klass juwmaqlawshı imtixanlarınıń nátiyjesine bola oqıwshılar texnikumlarǵa jiberiledi.
Muǵallim hám ustazlardı qollap-quwatlaw
2026-jıldan óndirislik bilimlendiriw ustazlarınıń miynet haqısı birinshi mamanlıq kategoriyasına iye muǵallimler dárejesine teńlestiriledi. Hár bir ustaǵa 20 oqıwshıdan artıq bolmawı belgilendi. Texnikum direktorlarına ustalar ushın ajıratılǵan miynet haqı fondı sheńberinde eń kem aylıq miynet haqınıń 15 esesine shekem aylıq belgilew wákilligi beriledi. Hár jılı eń jaqsı 50 usta hám oqıtıwshı sırt elde tájiriybe arttıradı.
Dual bilimlendiriwdegi jeńillikler
Dual bilimlendiriwde bilim alıp atırǵan oqıwshılarǵa hár ayda bazalıq esaplaw muǵdarınıń 1 esesi muǵdarında stipendiya tólenedi. Bul dáwir miynet stajına qosıladı. Dual bilimlendiriwdi shólkemlestirgen jumıs beriwshilerge 7 jıl múddetke 5 milliard sumǵa shekem jeńilletilgen kredit beriledi.
Milliy tańlaw hám reyting
2026-jıldan baslap Prezident sıylıǵı ushın “Kásiplik sheberlik milliy tańlawı” ótkeriledi. Milliy reytingte eń joqarı eliwlikke kirgen texnikumlardıń hár biri bazalıq esaplaw muǵdarınıń 3000 esesi muǵdarında xoshametlenedi.
Moratoriy hám finanslastırıw tártibi
2030-jılǵa shekem texnikumlardı saplastırıw, olardıń jer maydanları hám imaratların menshiklestiriwge moratoriy járiyalanadı. 2026-jıl 1-sentyabrden 9-klass pitkeriwshileri texnikumlarda tolıq mámleketlik byudjet esabınan oqıydı, 11-klastı pitkergen talabanlar bolsa tólemli-kontrakt tiykarında oqıydı.

Qaraqalpaqstan xabar agentligi