Ózbekstan Respublikası Prezidenti Shavkat Mirziyoevtiń mirát etiwine bola Serbiya Respublikası Prezidenti Aleksandr Vuchich rásmiy sapar menen mámleketimizde bolıp tur.

Joqarı mártebeli miyman búgin Ózbekstan Respublikası Bas ministriniń orınbasarı Ochilboy Ramatov penen birgelikte “Jańa Ózbekstan” parkine barıp, Ǵárezsizlik monumentine gúl qoydı.
Kompleks penen qısqasha tanısıw dawamında Serbiya delegaciyasınıń wákillerine bul ansambldiń mazmunı hám arxitekturalıq sheshimleri haqqında maǵlıwmat berildi.
“Jańa Ózbekstan” baǵı hám Ǵárezsizlik monumenti ǵárezsizligimizdiń otız jıllıǵına baǵıshlap qurılǵan. Úsh mıń jıldan aslam dáwir – ana Watanımız aymaǵındaǵı milliy mámleketshilik tariyxınıń tamırları sonshelli tereń. Monumentke itibar qaratqan adam mine, usı awır ótmishtiń kórkem súwretleniwine gúwa boladı.
Joqarı mártebeli miymanlar, rásmiy sırt el delegaciyalarınıń elimizge saparı sheńberinde bul jerdegi monumentke gúl qoyıw dástúrge aylanǵan.
Delegaciya aǵzaları komplekste sáwlelendirilgen ulamalar, ullı sárkarda hám jáhángirler, jadid babalarımızdıń tulǵalarına ayrıqsha itibar qarattı. Tınıshlıq, erkinlik, jaqsılıq tımsalı bolǵan Qumay qusı súwreti komplekstiń misli gúltajı sıyaqlı kórinetuǵını atap ótildi.

Behruz XUDOYBERDIEV,
Rustam NAZARMATOV (súwret),
ÓzA