Usı jıldıń 27-oktyabr sánesinen 30-noyabrge shekem Nókis qalasında birinshi márte Franciya mádeniyatı aylıǵı ótkeriledi.

Usı bir ay dawamında paytaxtımızda Franciya, Ózbekstan hám Qaraqalpaqstan Respublikası arasındaǵı kóp qırlı birge islesiwdi sáwlelendiretuǵın kóplegen mádeniy ilajlar bolıp ótedi.
Bul baǵdarlama I.Savickiy atındaǵı Qaraqalpaqstan mámleketlik kórkem óner muzeyi, Ózbekstan mámleketlik konservatoriyasınıń Nókis filialı, Ózbekstan mámleketlik kórkem óner hám mádeniyat institutınıń Nókis filialı, Berdaq atındaǵı akademiyalıq sazlı teatr, Kórkem óner akademiyası, sonday-aq, Nókis qalasındaǵı bir qatar oqıw orınları menen jaqın sheriklikte ámelge asırılmaqta.
Mádeniyat kúnleri sheńberinde, xalıqqa hár qıylı kórgizbeler, koncertler, sheberlik sabaqları, francuz xudojnikleri, rejissyorları hám sazendeleri menen dóretiwshilik ushırasıwlar bolıp ótedi. Sonıń ishinde mádeniyat aylıǵınıń tiykarǵı waqıyalarınan biri sıpatında – hújjetli kino hápteligi, “Sanlı gúz” sanlı kórkem óner festivalı, fotokórgizbeler, Trielen úshliginiń koncertleri hám pianinoshı Maksim Zekkiniydiń jeke shıǵıwların aytıp ótsek boladı.
– Mádeniyat kúnleri sheńberinde házirgi kúnleri belgilengen baǵdarlama boyınsha Nókis qalasındaǵı 1-sanlı mekteptiń joqarı klass oqıwshılarına francuz hám ózbek kinorejisyorları tárepinen túsirilgen bir neshe hújjetli filmlerdi qoyıp berip, olardıń túsiriw motivleri hám sheberlikleri haqqında oqıwshılarǵa keń túsinikler berip atırmız, – deydi hújjetli film boyınsha tájiriybeli rejisyor Lyuk Toven. – Sońınan olarǵa ózleriniń hújjetli filmin jaratıwına járdem beremiz. Mennen basqa bul seminarda franciyalı tájiriybeli rejissyor hám sayaxatshı Bruno Fromento, tashkentli jas rejissyor Sherzad Nazarov ta qatnaspaqta.
Qaraqalpaqstanǵa birinshi márte keliwim. Bul jer maǵan unadı. Aral teńizi hám Savickiy muzeyi haqqında internet arqalı maǵlıwmatlarǵa iyemen. Endi usı sapar dawamında sol jerlerge barıp sayaxat etiwdi de rejelestirip qoyıppan.
Nókiste ótkerilip atırǵan Franciya mádeniyatı aylıǵı francuz-ózbek mádeniy qarım-qatnasın rawajlandırıwda áhmiyetli basqısh, tájiriybe almasıw hám óz-ara birin-biri bayıtıw ushın jańa impuls bolatuǵınına isenemiz.

Adilbay Orazov,
Qaraqalpaqstan xabar agentligi sholıwshısı