Oliy Majlis Nızamshılıq palatasınıń gezektegi májilisi óz jumısın basladı. Onda dáslep «Sud – ekspertlik jumısı haqqında»ǵı nızam joybarı birinshi oqıwda kórip shıǵıldı. Usı joybar boyınsha Ádillik ministriniń orınbasarı Sherzod Rabbiev tolıq maǵlıwmat berdi:

– Mámleketimizde sud-ekspertlik tarawın jáne de eetilistiriw, usı tarawdaǵı mashqalalar boyınsha ilimiy izertlewler alıp barıw hám mámlekette sud ekspertizası teoriyası hám ámeliyatın rawajlandırıw, sud-ekspertiza shólkemleriniń jumısın qollap-quwatlaw baǵdarında sistemalı jumıslar ámelge asırılmaqta, – dedi ministr orınbasarı. – Búgin ámeldegi nızam tarawǵa baylanıslı bir qatar talaplardı jetilistiriwdi talap etedi. Usı maqsette islep shıǵılǵan bul nızam joybarı menen mámleketlik emes sud ekspertleriniń huqıqıy statusı belgilenbekte. Ilimiy jumıs penen shuǵıllanıwshı mákemeler (shólkemler) diń óz jumıs baǵdarı boyınsha sud-ekspertlik jumısın ámelge asırıwına ruxsat beriw názerde tutılmaqta.
Sud ekspertizası izertlewlerin ótkeriwde aldınǵı sırt el tájiriybesinen keńnen paydalanıw imkaniyatın jaratıw maqsetinde sud ekspertizasın tayınlaytuǵın uyımǵa (shaxsqa) óz baslaması menen yamasa mámleketlik sud-ekspertiza mákemesi baslıǵınıń ótinishine tiykarlanıp sud eksperti sıpatında sud ekspertizası tarawındaǵı sırt mámleketlik qánigelerdi tartıw huqıqı berilmekte.
Sud-ekspertlik jumısınıń isenimliligin bunnan bılay da arttırıw maqsetinde akkreditaciya hám validaciya institutları engizilmekte.
Bunnan tısqarı, advokattıń sorawı hám fizikalıq hám yuridikalıq táreplerdiń múrájatlarına muwapıq shártnama tiykarında mámleketlik hám mámleketlik emes sud ekspertleri tárepinen izertlewler ótkeriw hám ekspertlik juwmaq beriw tártipleri názerde tutılmaqta.
Búgingi kúnde 9 sud ekspertleri mákemeleri bar. Biraq sud ekspertleriniń sanı, huqıqıy normativlik hújjetlerde olardıń anıq reestri joq. Sol sebepli sud ekspertleriniń reestrin júrgiziw engizilmekte. Sud ekspertleriniń jumısı boyınsha kásiplik etika hám qaǵıydalar, ekspertizanı ótkeriwge baylanıslı sheklewler de belgilep qoyılmaqta.
Mámleketlik emes sud ekspertlerin birlestiretuǵın, olarǵa jaqınnan járdem beretuǵın Sud ekspertleri palatasın shólkemlestiriw hám onıń wazıypaları belgilenbekte. Bul palataǵa aǵzalıq ıqtıyarıy boladı.
Nızam joybarın islep shıǵıwda bir qatar sırt ellerde sud-ekspertlik jumısın tártipke salatuǵın normativlik hújjetler úyrenip shıǵıldı hám joybardı islep shıǵıwda inabatqa alındı.
Nızam joybarındaǵı normalar sud ekspertleri jumısınıń huqıqıy tiykarların bekkemlew, ekspertiza juwmaqlarınıń isenimliligin jáne de arttırıwǵa xızmet etedi, – dedi bayanatshi.
Májiliste deputatlar joybardı jetilistiriw boyınsha pikir-talaslar hám usınısların bildirdi. Kóterilgen bir qatar sorawlarǵa qánigeler tárepinen tolıq juwaplar qaytarıldı. Dodalawlardan soń nızam joybarı konceptual jaqtan qabıl etildi.

Muhtarama Komilova, ÓzA