Samarqandta ótkeriletuǵın YuNESKO Bas konferenciyasınıń 43-sessiyası sheńberinde búgin áyyemgi qalada YuNESKOnıń 14-Jaslar forumı óz jumısın basladı.

YuNESKO hám Ózbekstan Respublikası mádeniyat hám kórkem ónerdi rawajlandırıw qorı, Ózbekstan Jaslar isleri agentligi menen birgelikte shólkemlestirilgen forum jaslardıń klimat ózgeriwine qarsı gúresiwdegi belsene qatnasın qollap-quwatlaw, olardıń ideyaların global kólemde alǵa qoyıw hám turaqlı keleshekti qáliplestiriwde jigit-qızlardıń dawısın kúsheytiwge qaratılǵanı menen áhmiyetli bolıp esaplanadı. Onda qatnasıw ushın dúnyanıń 100 den aslam mámleketinen kelgen 150 jas jetekshi, ekspert hám xalıqaralıq shólkemlerdiń wákilleri “Klimat háreketi hám onıń sociallıq tásiri, ásirese, jaslar ushın” teması boyınsha óz-ara pikir alısıwı názerde tutılǵan.
Forumnıń ashılıw máresiminde YuNESKO Bas direktorınıń sociallıq hám gumanitarlıq ilimler boyınsha járdemshisi Lidiya Brito, Ózbekstan Respublikası Prezidenti Administraciyası Kreativ ekonomika hám turizm departamenti baslıǵınıń orınbasarı Elmurod Najimov, Ózbekstan Jaslar isleri agentliginiń bas direktorı Alisher Sadullaev hám basqalar shıǵıp sóylep, klimat ózgeriwi, ekologiyalıq mashqalalar búgin globallıq máselege aylanıp, dúnyadaǵı barlıq mámleketlerdiń húkimetin oylandırıp atırǵanı, ekologiyalıq krizis kóplegen apatshılıqlarǵa sebep bolıp atırǵanın atap ótti. Bunday jaǵdayda búgin hám erteńgi kúnniń sheshiwshi kúshi bolǵan jaslardıń baslamaları menen ideyaların tıńlaw, olardıń pikirlerine qulaq salıw oǵada áhmiyetli bolıp esaplanadı. Forumda dodalanatuǵın máseleler, ortaǵa taslanatuǵın baslamalar YuNESKO Bas konferenciyası 43-sessiyası ilajlarında itibarǵa alınadı, hár qıylı xalıqaralıq shólkemlerdiń wákilleri hám mámleketler delegaciyalarınıń qatnasıwında kórip shıǵıladı.
– Ózbekstan Respublikası YuNESKOnıń bilimlendiriw, ilim hám mádeniyat tarawları menen bir qatarda ekologiyalıq máseleler boyınsha shaqırıqlardı da qollap-quwatlap, bul baǵdarda isenimli poziciyasın kórsetip kelmekte, – dedi Ózbekstan Respublikası Prezidenti Administraciyası Kreativ ekonomika hám turizm departamenti baslıǵınıń orınbasarı Elmurod Najimov. – Bunı 2025-jıldıń elimizde “Qorshaǵan ortalıqtı qorǵaw hám “jasıl ekonomika” jılı dep atalǵanı mısalında da kóriw múmkin. Jıldıń atınan kelip shıǵıp tastıyıqlanǵan mámleketlik baǵdarlama tiykarında elimizde keń kólemli jumıslar ámelge asırıldı. Usı jıldıń basında Prezidentimizdiń baslaması menen Ózbekstan mádeniyat hám kórkem ónerdi rawajlandırıw qorı tárepinen birinshi márte Aral mádeniyatı sammiti ótkerildi, dúnyanıń túrli mámleketlerinen jaslardı birlestirgen “Aral mektebi” bilimlendiriw baǵdarlaması iske qosıldı. Bunday ilajlar arqalı biz turaqlı rawajlanıwǵa tosqınlıq etetuǵın ekologiyalıq mashqalalardıń aldın alıw hám olardıń tásirin jumsartıwǵa erispektemiz.
“Generation of Action” (háreketti baslaw) súreni astında ótkerilgen ashılıw máresiminde túrli mámleketlerdiń wákilleri klimat ózgeriwleriniń aldın alıw hám ekologiyalıq mashqalalardıń sheshimleri boyınsha baslama hám ideyaların alǵa qoydı, innovaciyalıq sheshimler usınıs etildi.
Sonıń ishinde, ispaniyalı Karloto Bruno óndiris hám sanaattıń rawajlanıwı ekologiyaǵa zıyan keltirmeytuǵının, zamanagóy texnologiyalardan paydalanıwda olardıń qorshaǵan ortalıqqa tásirin azaytıw zárúrligin atap ótti. Hátteki, azıq-awqat qáwipsizligi máselesi qanshelli áhmiyetli bolmasın, bul baǵdardaǵı sanaatta da ekologiyalıq turaqlılıqtıń buzılıwına jol qoyıp bolmaydı.
Mámleketimiz wákili Gúlnaz Abutova Qaraqalpaqstan mısalında Aral apatshılıǵınıń aqıbetlerin jumsartıw, usı aymaq xalqın taza ishimlik suwı menen támiyinlew baǵdarında ámelge asırılıp atırǵan jumıslar haqqında maǵlıwmat berdi.

Ǵolib HASANOV,
ÓzA