Prezident Shavkat Mirziyoev geologiya tarawına aldıńǵı xalıqaralıq tájiriybe hám kompetenciyalardı engiziw boyınsha prezentaciya menen tanıstı.

Májiliste mámleketimizdiń geologiya sistemasın zamanagóy ilimiy hám texnologiyalıq tiykarda rawajlandırıw, qazılma baylıqlar boyınsha resurs bazasın keńeytiw jáne mineral shiyki zattı tereń qayta islewdi támiyinlew áhmiyetli wazıypa ekeni atap ótildi.
Dúnya tájiriybesi geologiya-izlew jumısların ótkeriw qıyın bolǵan aymaqlarda da jasalma intellekt járdeminde jańa kánlerdi anıqlaw múmkin ekenligin kórsetpekte. Bul baǵdarda regionallıq izertlewlerdi keńeytiw hám zamanagóy geofizikalıq usıllardan paydalanıw qolaylı boladı.
Usı maqsette juwapkerler xalıqaralıq birge islesiwshiler, sonıń ishinde, kán-geologiya tarawında dúnyada aldınǵı bolǵan AQShtıń Kolorado kánshilik mektebi menen birgelikte ilimiy-izertlew hám ámeliy qollanbalardı birlestiretuǵın zamanagóy Kompetenciyalar orayın shólkemlestiriw joybarı haqqında málimleme berdi.
Oraydıń tiykarǵı wazıypaları izlew jumıslarına sanlı sheshimler, jasalma intellekt hám aero-geofizikalıq texnologiyalardı engiziwden ibarat boladı. Aldınǵı sırt el tájiriybesine tiykarlanıp, maǵlıwmatlardı sanlı túrde tallaw, geoximiyalıq hám kosmogeologiyalıq izertlewler nátiyjelerin integraciyalaw jáne perspektivalı kánlerdi anıqlawdı jedellestiriwge xızmet etedi.
Mámleketimiz basshısı usınıslardı maqullap, tarmaqta xalıqaralıq birge islesiwdi bekkemlew hám zamanagóy texnologiyalardı keńnen engiziw arqalı perspektivalı maydanlardı anıqlaw hám ózlestiriwdi shólkemlestiriw boyınsha bir qatar tapsırmalar berdi.

ÓzA