Ózbekstan Respublikası Prezidenti Shavkat Mirziyoev AQSh Prezidentiniń Qubla hám Oraylıq Aziya boyınsha arnawlı wákili Serjio Gor basshılıǵındaǵı delegaciyanı qabılladı.

Ushırasıwda AQSh Mámleketlik xatkeriniń orınbasarı Kristofer Landau hám basqa da rásmiy shaxslar da qatnastı.
Ózbekstan – AQSh strategiyalıq sheriklik qatnasıqların bıyıl 23-sentyabr kúni Nyu-York qalasında joqarı dárejede erisilgen kelisimlerdi ámelge asırıw sheńberinde bunnan bılay da rawajlandırıw máseleleri kórip shıǵıldı.
Ushırasıw aldınan Serjio Gor mámleketimiz basshısına AQSh Prezidenti Donald Tramptıń sálemi hám qızǵın tileklerin jetkerdi.
Jedel siyasiy sóylesiw, túrli dárejedegi almasıwlar hám jedel isbilermenlik baylanısları jolǵa qoyılǵanı qanaatlanıwshılıq penen atap ótildi. Tovar almasıw kólemi artpaqta, oktyabr ayınıń basında AQSh Sawda palatası delegaciyasınıń saparı tabıslı ótti.
Qabıl etilgen “jol kartası” tiykarında sanaat, qarjı, áhmiyetli minerallar, energetika, sanlastırıw, awıl xojalıǵı hám basqa da tiykarǵı baǵdarlardaǵı joybarlardı alǵa qoyıw áhmiyetli ekenligi atap ótildi.
Tárepler qáwipsizlik, terrorizm hám ekstremizm, nızamsız migraciyaǵa qarsı gúresiw tarawlarında sheriklikti bekkemlew máselelerin de dodaladı.
Global hám regionallıq áhmiyetke iye aktual máseleler boyınsha pikir alısıldı.
Bolajaq ilajlar rejesi, sonıń ishinde, kelesi hápte Vashington qalasında “S5+1” formatındaǵı sammitti ótkeriw máseleleri kórip shıǵıldı.

ÓzA