25-26-oktyabr kúnleri Oman mámleketiniń Maskat qalasında sporttıń Regbi-7 túri boyınsha qızlar arasında Asia Rugby Emirates Sevens Trophy 2025 turniri bolıp ótti.

CHempionatqa kontinetimizdiń eń kúshli komandaları qatnasıp, jeńimpazlıq ushın gúres alıp bardı.
Sherek finalda Iordaniyanı 46:0, yarım finalda Qubla Koreyanı 38:0 esabında jeńip shıǵıwǵa miyasar bolǵan Ózbekstan saylandı komandası, finalda Irandı 17:7 esabında artta qaldırıwǵa eristi hám turnirdiń altın medalı menen sıylıqlandı.
Respublikamız sport jankúyerleri ushın sonı ayrıqsha aytıp ótiwimiz kerek, bul jarısta Ózbekstan saylandı komandası quramında qaraqalpaqstanlı Nurjamal Nawrızbaeva, Aynura Abzieva, Sholpan Allambergenova, Hulkar Ollamberganova hám Nargiza Jumabaevalar da qatnasıp, saylandı komandamızdıń hár bir jeńisine ózleriniń salmaqlı úleslerin qostı.
Komandamız aǵzaların hám olardıń trenerlerin erisken bul jetiskenligi menen qızǵın qutlıqlaymız.

Adilbay Orazov,
Qaraqalpaqstan xabar agentligi sholıwshısı