Qaraqalpaqstan Respublikası paxtakeshleri 2025-jıl zúrááti ushın mámleketke paxta tapsırıw boyınsha belgilengen rejeni tolıq orınlap, tabıslarǵa qol jetkerdi.

2025-jıl ónimi ushın 80 mıń gektar egislik maydanǵa shigit egilip, 315 mıń 200 tonna ónimdi jıynap alıw belgilengen edi. Paxtakeshlerdiń pidákerlik miyneti sebepli reje 315 mıń 345 tonna etip orınlandı.
Bul nátiyjege erisiw jolında Ámiwdárya, Beruniy, Ellikqala, Taqıyatas rayonları birinshilerden bolıp, óz rejelerin orınladı. Bunnan soń, Nókis rayonı, Qońırat, Qanlıkól hám Qaraózek rayonları belgilengen shekti qolǵa kirgizdi. Taxtakópir, Shomanay hám Kegeyli rayonlarınıń paxtakeshleri de úlken qırmanǵa ózleriniń salmaqlı úlesin qostı.
Sonı da ayrıqsha aytıwımız kerek, paxtadan mol qırman jaratıwda Prezidentimizdiń Qaraqalpaqstan ushın ayrıqsha qabıl etilgen – “Qaraqalpaqstan Respublikasın kompleksli sociallıq-ekonomikalıq rawajlandırıw hám xalıqtıń bántligin támiyinlewdiń qosımsha ilajları haqqında”ǵı qararı tiykarında alıp kelingen 1000 nan aslam jańa texnikalardıń da úlesi salmaqlı boldı. Ásirese, paxta teriwdi mexanizaciyalastırıw baǵdarındaǵı áhmiyetli qádemlerden biri bolǵan 60 tan aslam paxta teriw mashinalarınıń atızlarda háreketleniwi zúráátti jıynap alıwda paxtakeshlerge ayrıqsha kúsh-ǵayrat baǵıshladı.
Bul jetiskenlik hár qanday hawa rayında kúni-túni miynet etip, paxta atızlarında jankúyerlik kórsetken Qaraqalpaqstan Respublikası fermerleri, diyqanları, klaster kárxanalarınıń jámáátleri, suwshılar, mexanizatorlar hám barlıq awıl hám suw xojalıǵı tarawı xızmetkerleriniń, sonıń menen birge, járdemge mútáj xalqımızdıń miynetlerini ń nátiyjesi bolıp esaplanadı.
Álbette, bul kóterilgen joqarı qırman elimiz ekonomikasın bekkemlew, rawajlandırıw hám jańa quwatlıqlardı iske qosıwǵa xızmet etedi.

Qaraqalpaqstan xabar agenitligi