Ózbekstan Respublikası Qorǵanıw ministrligi tiyisli shólkemler menen birgelikte jaslardı watansúyiwshilik ruwxında tárbiyalaw, mámleketimizde bolıp atırǵan jedel reformalardıń mazmunın jaslarǵa jetkeriwge baylanıslı kóplegen joybarlardı tabıslı ámelge asırıp kelmekte.

“Jeńis parki” estelik kompleksiniń ánjumanlar zalında “Ózbekstan – BMSh: birge islesiw perspektivaları” atamasında respublikalıq ilimiy-ámeliy konferenciya bolıp ótti.
Ilaj Ózbekstan Respublikası Qorǵanıw ministrligi hám Sarbon universiteti menen birgelikte shólkemlestirildi.
Bizge belgili, Ózbekstan Respublikası Prezidenti Shavkat Mirziyoev Birlesken Milletler Shólkemi Bas Assambleyasınıń 80-yubiley sessiyasında bir qatar áhmiyetli baslamalardı alǵa qoydı. Mámleketimiz basshısınıń bul shıǵıp sóylegen sózi hám baslamaları xalıqaralıq jámiyetshilik tárepinen joqarı tán alındı. Búgingi dúnyadaǵı global qıyın jaǵdayda BMShtıń 80 jıllıǵı hám onıń dúnya tınıshlıǵı jáne qáwipsizligin támiyinlewdegi ornı jáne de ayrıqsha áhmiyetke iye bolmaqta.
Ánjuman aldınan qatnasıwshılar “Millet pidayıları” estelik kompleksine barıp, ǵárezsizlik jıllarında xızmet wazıypasın orınlaw waqtında qaharmanlarsha qaytıs bolǵan áskeriy xızmetkerlerdiń esteligine húrmet kórsetti hám estelikke gúlsheńber qoydı.
Konferenciyada Qorǵanıw ministriniń watansúyiwshilik úgit-násiyatlaw, ruwxıy-aǵartıwshılıq jumıslar hám jaslar máseleleri boyınsha keńesgóyi Olimjon Wsarov moderatorlıq etti.
Konferenciyada xalıqaralıq huqıq, siyasat tarawında úlken bilim hám tájiriybege iye qánigeler qatnasıp, bayanat jasadı.
Sonıń ishinde, Ózbekstan Sudyaları associaciyasınıń baslıǵı, Ózbekstanda xızmet kórsetken yurist Ubaydulla Mingboev, Sarbon universitetiniń rektorı, texnika ilimleriniń doktorı Odilbek Asqaraliev, “Zamanagóy media tálim” MKSh direktorı, filologiya ilimleriniń doktorı, docent Beruniy Alimov hám basqalar Prezidentimiz Shavkat Mirziyoev tárepinen jańa Ózbekstandı qurıw baǵdarındaǵı iygilikli umtılıslar xalıqaralıq jámiyetshilik tárepinen joqarı tán alınıp atırǵanın atap ótti.
Ilaj sheńberinde BMSh penen birge islesiwdiń huqıqıy tiykarları, Ózbekstan tárepinen alǵa qoyılǵan xalıqaralıq baslamalardıń ámeliy áhmiyeti jáne global hám regionallıq qáwipsizlikti bekkemlewdegi rolin dodalawǵa itibar qaratıldı.
Ánjumanda, sonday-aq, Ózbekstan Respublikası Qorǵanıw ministrligi sistemasındaǵı bir qatar ilimiy hám mádeniy mákemeler – Ózbekstan Áskeriy qáwipsizlik hám qorǵanıw universiteti, Qorǵanıw ministrligi Ruwxıylıq hám mádeniyat departamenti, “Jeńis parki” estelik kompleksiniń izertlewshileri de qatnastı.
Konferenciya tek ǵana milliy hám xalıqaralıq dárejedegi áhmiyetli máselelerdi dodalaw emes, al tınıshlıq, qáwipsizlik hám turaqlı rawajlanıwdı támiyinlew jolında Ózbekstannıń konstruktivlik baslamaların jáne bir márte kórsetiw ushın áhmiyetli minber boldı.
Ilaj sheńberinde alǵa qoyılǵan pikir hám usınıslar BMSh penen birge islesiwdi jáne de tereńlestiriw, jáhán hám regionallıq qáwipsizlikti bekkemlew jáne mámleketler arasında óz-ara isenim hám awızbirshilik ortalıǵın keńeytiwge xızmet etetuǵını sózsiz.

ÓzA