Prezident Vladimir Zelenskiy Bryusseldegi sammitte Rossiyaǵa hesh qanday aymaqlıq jeńillik berilmeytuǵının ayttı. “Euronews”tiń jazıwınsha, Ukraina jetekshisiniń bul bildiriwi Moskva urıstı toqtatıwdan bas tartıp, EA hám AQSh RFǵa jańa sankciya kirgizgennen soń jańlaǵan.

Kreml talabın ózgertpey atır: Qırım, Doneck, Lugansk, Zaporoje hám Xerson ústinen qadaǵalawdı saqlap qalıw niyetinde.
AQSh baspasózi Putin Trampqa jańa usınıs bergenine itibar qaratqan. Yaǵnıy, Ukraina óziniń qadaǵalawındaǵı Donbasstıń bir bólegin beriwi, onıń ornına Xerson hám Zaporoje wálayatlarınıń kishi aymaqlıq bólegin alıwı kerek.
Gáp mámlekettiń shıǵısındaǵı Doneck wálayatı haqqında barmaqta. Lugansk penen birge Donbass dep atalatuǵın, iri sanaat aymaǵı esaplanǵan bul aymaqtı rossiyalılar 2014-jıldan berli tolıq qadaǵalawǵa alıwǵa urınıp kelmekte.
Zelenskiydiń pikirinshe, urıstı házirgi front shegarası boylap muzlatıw házirgi waqıtta eń maqul, teń salmaqlı sheshim bolıwı múmkin. Bul qarardı ol áskeriy háreketti toqtatıw jolındaǵı birinshi qádem sıpatında kórip atırǵanın bildirgen.
– Tilekke qarsı, Putin bul usınıstı qollap-quwatlaytuǵınına isenimim joq, – degen Zelenskiy.
Maǵlıwmatlarǵa qaraǵanda, Kiev Ukraina aymaǵında dárriw hám hesh qanday shártsiz oq atıwdı toqtatıw ushın eń durıs jol dep esaplanıp atırǵan áne usı qatnastı Tramp penen bolıp ótken dáslepki sóylesiwden-aq alǵa qoyıp kelmekte. Keyingi basqıshta bolsa Zelenskiy hám Putinniń tikkeley sóylesiwi názerde tutılǵan.
Kreml bul rejege kelisim bermedi. Bunnan keyin Moskvaǵa basımdı kúsheytiw hám ruslardı hújimdi toqtatıwǵa májbúrlew maqsetinde AQSh “Rosneft” hám “Lukoyl”ǵa sankciya kirgizdi. Bul haqqında Qurama Shtatlar qarjı ministri Skott Bessent bılay dedi:
– Putin biymáni urıstı toqtatıwdan bas tartqanı ushın Kremldiń áskeriy mashinasın qarjılandırıp atırǵan eki iri rus neft kompaniyasına sankciya qoyamız.
Putin jurnalistler menen ushırasıwda atap ótiwinshe, “bul sheklewdiń ayrıqsha tásiri sezilmeydi.”

Kenja Bekjonov, Uluǵbek Twxtaev, ÓzA