Bıyılǵı jılı respublikamızdıń qala hám rayonlarında gaz tarmaqların 2025-2026-jılǵı gúzgi-qısqı máwsimge tayarlaw jumısları juwmaqlanıp tutınıwshılardıń tábiyǵıy gazden paydalanıwına jańa imkaniyatlar jaratıldı.

«Hududgaz Qaraqalpaqstan» gaz támiynatı filialı tárepinen gúzgi-qısqı máwsimde tábiyǵıy gazdiń turaqlı jetkerip beriw maqsetinde aldın ala rejelestirilgen grafigi boyınsha tayarlıq jumısları alıp barıldı.

Usı jumıslardıń Nókis rayonında ámelge asırılıwı qay dárejede?

– Rayonımızda bıyılǵı jılı rejedegi 4,1 kilometrlik gaz tarmaqları rekonstrukciyalandı, – deydi Nókis rayonlıq gaz támiynatı bóliminiń bas injeneri Íqlas Baxiev. – Bir gaz bólistiriw punktinde kapital ońlaw jumısları alıp barıldı.

Sonday-aq, 60 kilometrlik jer ústi gaz tarmaqları hawa basımı járdeminde sınawdan ótkerilip,  15,3 kilometrlik jer astı gaz tarmaqlarınıń texnikalıq jaǵdayları kózden ótkerildi.

Rayondaǵı Darsan mákan puqaralar jıyını aymaǵında jaylasqan jer astı orta basımlı d-219 mm.lik gaz tarmaǵında 1,7 kilometrlik gaz tarmaǵı jer astınan jer úsine shıǵarılıp, tolıq rekonstrukciyalandı. Nátiyjede usı MPJ aymaǵındaǵı Jiydeli awılı, Aqterek, Baqanshaqlı APJ aymaqlarındaǵı jám 6582 jeke xojalıqlardıń gaz támiynatı jaqsılanıwına erisildi.

Bul baǵdardaǵı jumıslar nátiyjeli dawam etpekte.

Á.Jiyemuratov,

Qaraqalpaqstan xabar agentligi.