Ózbekstan Respublikası Ministrler Kabinetiniń “Básekini támiyinlewge járdemlesiw hám tutınıwshılardıń huqıqların qorǵaw tarawındaǵı mámleketlik emes kommerciyalıq emes shólkemlerdi xoshametlew hám qollap-quwatlaw ilajları haqqında”ǵı qararı qabıl etildi.

Usı qararǵa bola, mámleketlik emes kommerciyalıq emes shólkemler (MKSh) tárepinen “sırlı qarıydar” hám qadaǵalaw satıp alıw ilajların ámelge asırıw tártipleri belgilendi. Bul arqalı medicinalıq xızmet kórsetiw hám sawda tarawlarında nızam talaplarına ámel etiliwin MKShlar tárepinen qalıs bahalaw sisteması engiziledi.
Sonday-aq, endi Komitet hám onıń aymaqlıq uyımları tárepinen jáne tájiriybe dáwirinde mámleketlik emes shólkemlerdiń qatnasıwında qadaǵalaw satıp alıwı hám “sırlı qarıydar” ilajları nızamlılıq, qalıslıq hám jasırınlıq principlerine tiykarlanıp ótkeriledi. Bul ilajlar boyınsha reje Komitet tárepinen islep shıǵılıp, rásmiy túrde tastıyıqlanadı. Hár bir ilaj boyınsha juwapkerler, orın, múddet, tekseriletuǵın májbúriy talaplar hám foto-video jazıw tártibi buyrıq penen belgilenedi. Qadaǵalaw satıp alıw procesinde alınǵan úlgi hám maǵlıwmatlar tiyisli laboratoriyalarda sınaqtan ótkeriledi. Eger tovar yamasa xızmet nızam talaplarına muwapıq bolmasa, tiyisli wákillikli uyımlarǵa jiberiledi hám jámiyetshilikke málim etiledi.
Birinshi márte nızambuzıwshılıq anıqlansa, túsindiriw hám járdem ilajları kóriledi, qaytalanǵan jaǵdaylarda bolsa tekseriw belgilenedi.
Mámleketlik emes shólkemler óz qarjıları esabınan ilajlardı ámelge asıradı, Komitet bolsa bul jumıstı muwapıqlastıradı hám metodikalıq járdem kórsetedi.
Bunnan tısqarı, qarar arqalı densawlıqtı saqlaw tarawında “sırlı qarıydar” usılı menen medicina hám dárixana xızmetleriniń sapasın bahalaw jáne usaqlap satıwda qadaǵalaw satıp alıw processlerin nızam sheńberinde jolǵa qoyıw ushın anıq huqıqıy tiykar jaratıldı.
Qararǵa muwapıq, Básekini rawajlandırıw hám tutınıwshılardıń huqıqların qorǵaw tarawında juwapker uyımlar belgilendi.
Básekini rawajlandırıw tarawında – Báseki komiteti, Ekonomika hám qarjı ministrligi, Investiciyalar, sanaat hám sawda ministrligi, Awıl xojalıǵı ministrligi, Transport ministrligi, Qurılıs hám turaq jay kommunal xojalıǵı ministrligi, Energetika ministrligi hám Sanlı texnologiyalar ministrligi.
Tutınıwshılardıń huqıqların qorǵaw tarawında – Báseki komiteti, Ministrler Kabineti janındaǵı Ózbekstan texnikalıq jaqtan tártipke salıw agentligi, Densawlıqtı saqlaw ministrligi, Qurılıs hám turaq jay kommunallıq xojalıǵı ministrligi, Ekologiya, qorshaǵan ortalıqtı qorǵaw hám klimat ózgeriwi ministrligi.
Bul juwapker uyımlar hár jılı keminde bir márte mámleketlik emes kommerciyalıq emes shólkemlerge ózlerine biriktirilgen tarawlarda tallawlar ótkeriw, mashqalalardı úyreniw hám óz wákillikleri sheńberinde basqa da ilajlardı shólkemlestiriw boyınsha byudjetten tısqarı qarjıları esabınan mámleketlik sociallıq buyırtpalar beredi.
Engizilgen tártipler xızmet kórsetiw hám sawda tarawlarında ádil báseki ortalıǵın qáliplestiriw menen birge MKShlardıń jumısın qollap-quwatlap, tutınıwshılardıń huqıqları hám xızmet kórsetiw sapası monitoringi ushın nátiyjeli instrumentlerdi usınıwǵa xızmet etedi.

N.Rahmonova, ÓzA