Usı jıldıń 22-oktyabr kúni Rossiya Federaciyasınıń Moskva wálayatında Ózbekstan hám Rossiya aymaqları keńesiniń ekinshi májilisi bolıp ótti.

Ilajda Rossiya delegaciyasına Rossiya Húkimeti Baslıǵınıń birinshi orınbasarı Denis Manturov, Ózbekstan tárepine Ózbekstan Respublikası Bas ministriniń orınbasarı Jamshid Xodjaev basshılıq etti.
Bul ilaj eki mámleket arasındaǵı strategiyalıq sheriklik hám awqamlaslıqtıń joqarı dárejesin jáne bir márte tastıyıqladı, desek aljaspaǵan bolamız.
Forumda Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵındaǵı Qaraqalpaqstan delegaciyası qatnastı.
Onda Joqarǵı Keńes Baslıǵı shıǵıp sóylep, sońǵı jılları mámleket basshısınıń ayrıqsha itibarı menen Qaraqalpaqstannıń investiciyalıq tartımlılıǵın arttırıw, isbilermenler ushın qolaylı sharayatlar jaratıw, isbilermenlik joybarlardı qollap-quwatlaw jańa basqıshqa kóterilgenligi atap ótildi.
Bunnan tısqarı, forumda sawda-ekonomikalıq birge islesiwdi keńeytiw, sanaat kooperaciyası, awıl xojalıǵı tarawındaǵı óz-ara baylanıslar hám mádeniy-gumanitarlıq sheriklikti rawajlandırıw máseleleri dodalandı. Ásirese, elektron sawda, qospa sanaat kárxanaların shólkemlestiriw, kótere sawda-bólistiriw orayların rawajlandırıw, sonday-aq, miynet bazarında talap joqarı bolǵan qánigelerdi tayarlaw ushın dual bilimlendiriw sistemasın engiziw máselelerine ayrıqsha itibar qaratıldı.

Ilajda Rossiya hám Ózbekstan aymaqları arasında sawda-ekonomikalıq, ilimiy-texnikalıq hám gumanitarlıq tarawlardı qamtıp alǵan 30 dan aslam hújjetlerge qol qoyıldı. Sonıń ishinde, Qaraqalpaqstan delegaciyası hám Rossiyanıń Bashqurtstan, Buryatiya hám basqa da aymaqları arasında birge islesiw boyınsha kelisimlerge qol qoyıldı.

Qaraqalpaqstan xabar agentligi