Qaraqalpaqstanda jaslardıń isbilermenlikke qızıǵıwshılıǵı barǵan sayın artıp atırǵanı jaqında bolıp ótken “Biznes klub” kastinginde ayrıqsha kózge taslandı.

Ilaj ÓzLiDeP Qaraqalpaqstan Respublikası Keńesi janındaǵı “Hayal-qızlar qanatı” bólimi hám “Jaslar keleshegimiz” qorınıń Qaraqalpaqstan filialı menen birgelikte Jaslar orayında shólkemlestirildi.
Onda isbilermenlikti baslaw niyetinde bolǵan 250 ge shamalas jaslar qatnasıp, olardıń arasında 180 qızdıń bar ekenligi házirgi waqıtta hayal-qızlar arasında isbilermenlik hám belsendilik artıp atırǵanın kórsetedi.
Jaslar komissiya aǵzalarına ózleriniń innovaciyalıq hám aldaǵı biznes ideyaların usındı. Usınıs etilgen joybarlar arasında jergilikli ónim islep shıǵarıwdı jolǵa qoyıw, xızmet kórsetiw tarawın rawajlandırıw hám jańa jumıs orınların jaratıwǵa qaratılǵan ideyalar ayrıqsha áhmiyetke iye boldı.
Kasting nátiyjelerine muwapıq, júzege shıǵarıw imkaniyatı joqarı bolǵan 40 bolajaq isbilermen tańlap alındı. Olar “Biznes klub”tıń endigi máwsiminde qatnasıp, tájiriybeli qánigelerdiń basshılıǵında biznes júrgiziw kónlikpeleri, finanslıq rejelestiriw hám bazarda óz ornın tabıw strategiyaların úyrenedi. Sonday-aq, qatnasıwshılar ushın grant baǵdarlamaları hám jeńilletilgen joybarlarda qatnasıw imkaniyatı jaratıladı.
Shólkemlestiriwshilerdiń atap ótiwinshe, bul baslama jaslardıń isbilermenlik jumısına bolǵan qızıǵıwshılıǵın arttırıw, olardıń aldıńǵı ideyaların ámeliyatqa engiziw hám zamanagóy pikirleytuǵın jańa áwlad isbilermenlerin tayarlawǵa qaratılǵan.

Qaraqalpaqstan xabar agentligi