Moskva wálayatında Ózbekstan hám Rossiya aymaqları keńesiniń ekinshi májilisi bolıp ótti. Rossiya delegaciyasına Húkimet Baslıǵınıń birinshi orınbasarı Denis Manturov, Ózbekstan tárepine bolsa Bas ministrdiń orınbasarı Jamshid Xwjaev basshılıq etti.

Moskva wálayatında Ózbekstan hám Rossiya aymaqları keńesiniń ekinshi májilisi bolıp ótti. Rossiya delegaciyasına Húkimet Baslıǵınıń birinshi orınbasarı Denis Manturov, Ózbekstan tárepine bolsa Bas ministrdiń orınbasarı Jamshid Xwjaev basshılıq etti.
Bul forum eki mámleket arasındaǵı strategiyalıq sheriklik hám awqamlaslıqtıń joqarı dárejesin jáne bir márte tastıyıqladı.
Búgingi kúnde Ózbekstannıń 14 wálayatı Rossiya Federaciyasınıń 50 den aslam subekti menen baylanıs ornatqan, birgeliktegi joybarlardıń ulıwma bahası 6,2 milliard dollardan artqan.
Májiliste sawda-ekonomikalıq birge islesiw kólemin keńeytiw, sanaat kooperaciyası, awıl xojalıǵı tarawındaǵı jáne mádeniy-gumanitarlıq sheriklikti rawajlandırıw máseleleri dodalandı. Ásirese, elektron sawda, birgeliktegi sanaat kárxanaların shólkemlestiriw, kótere sawda-bólistiriw oraylarınıń sanın arttırıw, sonday-aq, miynet bazarında talap joqarı bolǵan qánigeler tayarlaw ushın dual bilimlendiriw sistemasın engiziw zárúrligine ayrıqsha itibar qaratıldı.
Rossiya hám Ózbekstan aymaqları arasında sawda-ekonomikalıq, ilimiy-texnikalıq hám gumanitarlıq tarawlardı qamtıp alǵan 30 dan aslam hújjetke qol qoyılǵan bul ilaj aymaqlararalıq birge islesiwdi bekkemlew jolında qoyılǵan gezektegi isenimli qádem boldı.
Esletip ótemiz, 2024-jıl 27-may kúni Tashkent qalasında Ózbekstan hám RF Prezidentleri Shavkat Mirziyoev hám Vladimir Putin basshılıǵında Aymaqlar keńesiniń birinshi májilisi bolıp ótkenin esletip ótemiz. Sol waqıtta ulıwma bahası 5 milliard dollardan aslam shártnamalar toplamı islep shıǵılǵan.
Ózbekstan-Bashqurtstan sanaat parkiniń qurılısı dekabr ayında baslanıwı
múmkin
Tashkent wálayatında qurılatuǵın Ózbekstan – Bashqurtstan birgeliktegi sanaat parkiniń qurılısın usı jıldıń dekabr ayında baslaw rejelestirilgen. Bul haqqında Bashqurtsan Respublikası basshısı Radiy Xabirov eki mámleket wálayatlar keńesiniń ekinshi májilisinde jurnalistlerge málim etti. Ótken jılı aprel ayında Bashqurtstan húkimeti delegaciyasınıń elimizge rásmiy saparı waqtında “Wzkimyosanoat” AJ usı respublikanıń Rawajlanıw korporaciyası menen bul baǵdarda tiyisli kelisimge qol qoyılǵan.
– Tashkent wálayatında sanaat parkin shólkemlestiriw boyınsha jumıstı jedellestiriwimiz kerek, sebebi bizde rezidentler bar hám bul joybardan eki tárep te mápdar, – dedi Bashqurtstan Respublikası basshısı Radiy Xabirov. – Biz ushın jaratılıp atırǵan sharayatlardan qanaatlanamız. Dekabrde qurılıstıń tırnaǵın qoyamız, dep úmit etemen. Ulıwma, pútkil region kóleminde áyne Ózbekstan menen birge islesiwimiz jedel rawajlanbaqta. Bul pát ónim almasıw procesinde de sáwlelenbekte. Óz-ara sawda aylanısı ótken jılǵa salıstırǵanda 17 procentke artqan. Quwanıshlı tárepi, 92 bántten ibarat “Jol kartası” menen bekkemlengen sherikligimiz sistemalı túrge engen.
CHuvashiya basshısı: Ózbekstan menen bilimlendiriw joybarları jolǵa qoyılǵan
CHuvashiya Respublikası basshısı Oleg Nikolaev Ózbekstan Respublikası menen birgeliktegi bilimlendiriw baǵdarlamaların islep shıǵıw, atap aytqanda, óz-ara til úyreniw boyınsha sezilerli jetiskenliklerge erisilgenin málim etti.
– Bizge belgili, miynet migraciyası birge islesiwdiń eń áhmiyetli baǵdarlarınan biri bolıp esaplanadı, – dedi ol. – Ózbekstanda xalıq sanınıń ósiw páti júdá joqarı ekenin jaqsı bilemiz. Bul jaǵday jaslardı jumıs penen támiyinlew zárúrligin kúsheytedi. Biz Rossiya Federaciyasında jumıs islew tilegin bildirgen sırt elliler tek ǵana rus tilin biliwi emes, al zárúr kónlikpege de iye bolıwınan mápdarmız. Sonıń ushın sońǵı jıllarda birgeliktegi bilimlendiriw joybarları jedel alǵa qoyılmaqta. Birgeliktegi kárxanalar shólkemlestiriw tájiriybe, bilim almasıw, tájiriybe arttırıw imkaniyatın beredi. Eń áhmiyetlisi, sherikligimiz hár eki tárep isbilermenleriniń mápine tiykarlanǵan. Áyne usı processte isbilermenlerdiń táshwishi, mashqalasına itibar qaratamız, sorawlarına juwap beremiz, hújjetlerin rásmiylestiremiz. Soń birgeliktegi ilajlardı islep shıǵıp, zárúr sheshimlerdi tabamız. Bul baslamalar unamlı nátiyje bermekte.
Region basshısı CHuvashiya Ózbekstannıń úsh wálayatı – Qashqadárya, Buxara hám Nawayı menen birge islesiw haqqındaǵı kelisimge qol qoyılǵanın qosımsha etti.

ÓzA