Italiya paytaxtı Rim qalasında BMShtıń Azıq-awqat hám awıl xojalıǵı shólkemi (FAO) bas rezidenciyasında bolıp ótip atırǵan Pútkil jáhán azıq-awqat forumı sheńberinde Ózbekstannıń jaslar bólimi – “WFF Uzbekistan National YouthChapter” shólkemlestirilgeni járiyalandı.

Usı múnásibet penen qatnasıwshılarǵa jańa bólim jumısınıń baslanǵanın tastıyıqlawshı sertifikatlar tapsırıldı.
Bólimniń tiykarǵı maqseti jaslardıń dawısın kúsheytiw, olardı turaqlı azıq-awqat sistemaların qáliplestiriw procesine tartıw, sonday-aq, innovaciyalıq, ekologiyalıq hám sociallıq sheshimler arqalı awıl xojalıǵın jańa áwlad ushın tartımlı tarawǵa aylandırıw bolıp esaplanadı.
Jaslar bólimi bul azıq-awqat qáwipsizligi, turaqlı awıl xojalıǵı hám klimat baslamaları tarawında jaslardıń jetekshiligin rawajlandırıwǵa qaratılǵan jańa platforma bolıp esaplanadı. Bul tek ǵana Ózbekstanda emes, al pútkil Oraylıq Aziya regionında shólkemlestirilgen birinshi Jaslar bólimi bolıp esaplanadı.
Baslama mámlekettiń awıl xojalıǵı tarawında belsene islep atırǵan jas jetekshiler toparı tárepinen alǵa qoyılǵan.
Jaslardıń jumısı sheńberinde klimat ózgeriwine qarsı gúresiw, suw resurslarınan aqılǵa uǵras paydalanıw, jer degradaciyasınıń aldın alıw hám ónimdarlıqtı arttırıw, azıq-awqat qáwipsizligin támiyinlew jáne jaslardıń xalıqaralıq dárejedegi agrar sistemalarda qatnasıwın keńeytiw baǵdarlarında baslamalar bildiriledi.

Behruz Xudoyberdiev, ÓzAnıń xabarshısı