Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komitetiniń májilisinde Ózbekstannıń BAÁ, Kuveyt hám Hindstandaǵı diplomatiyalıq wákilxanalarınıń basshıları óz jumısı haqqında esabat berdi.

Eki tárepleme qatnasıqlardı rawajlandırıw, joqarı hám joqarı dárejedegi sapar etiwler sheńberinde qol qoyılǵan “jol kartaları”nıń orınlanıwın támiyinlew máseleleri izbe-iz orınlanıp atırǵanı atap ótildi.
Investiciyalıq hám sawda baylanısların keńeytiw, energetika, sanaat, qurılıs hám awıl xojalıǵı tarawlarında birgeliktegi joybarlardı ámelge asırıw, turizmdi rawajlandırıw jáne sırt eldegi watanlaslarımızdıń huqıqları menen máplerin qorǵaw baǵdarında ámelge asırılıp atırǵan jumıslar haqqında maǵlıwmat berildi.
Ózbekstannıń BAÁ, Kuveyt hám Hindstan menen sawda-ekonomikalıq, investiciya, energetika, sanaat, innovaciya tarawlarındaǵı kóp tárepleme birge islesiwi barǵan sayın keńeyip barmaqta. “Jasıl ekonomika”, “aqıllı qalalar” hám zıyarat, medicina hám isbilermenlik turizmi sıyaqlı áhmiyetli baǵdarlarda jetekshi sırt el kompaniyaları menen birgelikte perspektivalı iri joybarlar ámelge asırılmaqta.
Sonıń menen birge, mámleketimizdiń usı mámleketler menen ekonomika, qarjı, energetika, bilimlendiriw, transport, logistika, farmacevtika, awıl xojalıǵı hám málimleme texnologiyaları sıyaqlı áhmiyetli tarawlardaǵı óz-ara birge islesiw baylanısları rawajlanıp atırǵanı atap ótildi.
Prezidentimiz tárepinen belgilengen wazıypalardan kelip shıǵıp, elshixanalar hár bir tarawdı rawajlandırıw ushın zamanagóy, innovaciyalıq hám sanlı texnologiyalar jáne jasalma intellektten nátiyjeli paydalanıw boyınsha tiyisli jumıslardı ámelge asırmaqta.
Májilis juwmaǵında diplomatiyalıq wákilxanalar jumısınıń nátiyjeliligin arttırıw, sırtqı ekonomikalıq birge islesiw hám turizmdi janlandırıw, aymaqlar arasındaǵı birge islesiwdi rawajlandırıw ushın sırt el investiciyaların tartıw, sonıń ishinde, sırt elde kórgizbeler hám sawda úylerin qollap-quwatlaw arqalı eksport kólemin arttırıw sıyaqlı bir qatar usınıslar bildirildi.

N.Abduraimova, ÓzA