Házirgi waqıtta orınlarda qánigeler tárepinen “Bajıxana aymaǵında qayta islew” bajıxana rejiminiń abzallıqları hám ámelde qollanılıwı boyınsha úgit-násiyat jumısları alıp barılmaqta. Atap aytqanda, Bajıxana basqarmasınıń juwapker xızmetkerleri isbilermenlerge sırt el investiciyaların tartıw hám ózleriniń isbilermenlik jumısın rawajlandırıw, eksport potencialın arttırıw boyınsha úgit-násiyat jumısların alıp barmaqta.

Bajıxana xızmetkerleri radiator islep shıǵarıwǵa qánigelesken jańa “OSTEN TECHNOLOGIES” JShJ kárxanasında bolıp, kárxananıń jumısın úyrendi.
Bul kárxana 900 mıń dana “radiator” ónimin islep shıǵarıw quwatlılıǵına iye bolıp, 300 jańa jumıs ornın jaratıwǵa mólsherlengen.
21 million AQSh dolları muǵdarındaǵı investiciya tiykarında shólkemlestirilgen bul kárxana 2025-jıldıń 9 ayı dawamında kárxananıń jumıs islewi ushın zárúr bolǵan 13 million AQSh dolları muǵdarındaǵı texnologiyalıq ásbap-úskeneler hám onıń awısıq bólekleri jáne usınday ónimler alıp kelinip, jámi 23 milliard sum muǵdarında bajıxana jeńillikleri qollanılǵan.
Kárxana házirgi waqıtta islep shıǵarıp atırǵan ónimlerin ishki bazarǵa baǵdarlamaqta hám keleshekte Rossiya, Qazaqstan, Túrkiya mámleketlerine eksport etiwdi rejelestirgen.
Ushırasıw dawamında kárxana wákillerine jańa qolaylıq sıpatında, “Bajıxana aymaǵında qayta islew” bajıxana rejiminiń abzallıqları túsindirilip, ónimlerdi qayta islep, tayar ónim sıpatında bazarǵa shıǵarıwı yamasa eksport kólemin arttırıwı boyınsha másláhátler berildi.

Qaraqalpaqstan xabar agentligi