Qaraqalpaqstan Respublikası sudı, Qaraqalpaqstan Respublikası hákimshilik sudı hám Májbúriy orınlaw byurosı Qaraqalpaqstan Respublikası basqarması menen birgelikte sud hújjetleriniń orınlanıwın támiyinlewge baǵıshlanǵan seminar bolıp ótti.

Videokonferenciya baylanıs rejiminde ótkerilgen seminarǵa respublikadaǵı barlıq sudyalar hám májbúriy orınlaw byurolarınıń rayon (qala) lıq bólimleriniń orınlawshıları qatnastı.
Ilajdı Qaraqalpaqstan Respublikası sudınıń baslıǵı K.Tarixov ashıp berdi. Ol óziniń shıǵıp sóylegen sózinde ótkerilip atırǵan seminardıń áhmiyetine toqtap ótip, sud hújjetleriniń orınlanıwın támiyinlewde mámleketlik uyımlar arasındaǵı birge islesiwdi hám juwapkershilikti kúsheytiw zárúrligin atap ótti. Sonday-aq, bul baǵdarda alıp barılıp atırǵan jumıslardı sistemalı tiykarda dawam ettiriw kerekligine itibar qarattı.
Seminar dawamında Qaraqalpaqstan Respublikası jınayat, puqaralıq hám ekonomikalıq isler boyınsha sudları tárepinen 2025-jıldıń dáslepki toǵız ayı dawamında Májbúriy orınlaw byurolarına jiberilgen orınlaw hújjetleri, olardıń orınlanıwı hám qaytarılıw jaǵdayları boyınsha tolıq tallawlar ótkerildi. Sonıń menen birge, Májbúriy orınlaw byurolarına kelip túsken orınlaw hújjetleriniń orınlanıwı hám házirgi jaǵdayı dodalanıp, bul processti bunnan bılay da jetilistiriw boyınsha anıq usınıslar ortaǵa taslandı.
Ilajda Qaraqalpaqstan Respublikası sudı baslıǵınıń orınbasarı A.Adilov shıǵıp sóylep, rayonlararalıq, rayon hám qala sudlardıń basshılarına Májbúriy orınlaw byurosı menen birge islesiwdi bunnan bılay da kúsheytiw zárúrligin atap ótti. Ol bul birge islesiw sud hújjetleriniń óz waqtında hám nátiyjeli orınlanıwın támiyinlewde úlken áhmiyetke iye ekenligine itibar qarattı.
Sonday-aq, Qaraqalpaqstan Respublikası sudı baslıǵınıń orınbasarı A.Kerimbaev sud hújjetleriniń orınlanıwın támiyinlewdegi áhmiyetli máseleler boyınsha óziniń pikir-usınısların bildirdi. Ásirese, sud hújjetlerin orınlaw procesinde ushırasıp atırǵan mashqalalardı saplastırıw, orınlaw tártibin kúsheytiw, sudlar hám májbúriy orınlaw uyımları arasındaǵı birge islesiwdi jańa basqıshqa alıp shıǵıw zárúrligin atap ótti.
Seminar juwmaǵında qatnasıwshılar tárepinen sud hám Májbúriy orınlaw byuroları arasındaǵı óz-ara birge islesiwdi bekkemlew, orınlaw tártibin arttırıw hám nızam ústinligin támiyinlewge qaratılǵan ámeliy ilajlardı bunnan bılay da kúsheytiw boyınsha tiykarǵı wazıypalar belgilendi.

Qaraqalpaqstan xabar agentligi